Pyrshah ki Waheh Shnong iaka jingkynriah kam ia u DC East Jaintia Hills

Syllad | The Rising MeghalayaNovember 18, 2021

Ka Synjuk ki Waheh Shnong East Jaintia Hills District kala pynpaw iaka jingpyrshah kaba jur halor ka jingkynriah kam ia u Deputy Commissioner, East Jaintia Hills Bah Ethelbert Kharmalki/.

Ha u kyrwoh bala phah da u president ka synjuk Ma Satly Ryngkhlem bad u Secretary Ma Jesper Bareh hadien bala mih ka jingpynbna kynriah kam ia u Bah Kharmalki kum u DC ka District, kila pynpaw ba ka synjuk kala lum jingialang kyrkieh bad da kawei ka sur kala pyrshah jur iaka jingpynbna ka sorkar.

“Kane ka jingleh ka sorkar ka long kaei kaei ka bym sngew iahap bad pdiang namar ka wanrah ka jingthut ha ka rukom treikam jong ki officer haba tang ka samoi treikam jong ki kam pat kut,” la ong u kyrwoh ka synjuk waheh shnong East Jaintia Hills Hills.

Ka synjuk kala ong ruh ba kane ka jingkynriah kam khah khah iaki DC haka district ka pynthud iaka jingpyntrei iaki kam pynroi bad kiwei kiwei ki kam kiba iadei bad ki kam shnong.

“Ngi la sakhi ba u Bah E. Kharmalki kum u DC ka EJHD, u long u briew ba treihok bad ym ju pynsahteng ia kano kano ka kam ha ba iadei bad ki paidbah jong ka District. Kum u ne u briew ka District ka dang donkam ia u ban neh shuwa hapoh ka District khamtam ba ka por treikam jong u ruh kam pat kut,” ong shuh shuh u kyrwoh na ki nongialam ka synjuk waheh shnong East Jaintia Hills bad dawa naka sorkar ban pyndam shuwa ia kane ka jingkynriah kam ia u DC ka district.