Pyrshah lilam wah Lukha ka 6 shnong

Syllad | The Rising MeghalayaNovember 25, 2020

Ka 6 Shnong Wah Lukha Association ka pyrshah jur ia ka jingdie lilam (auction) ia ka wah Lukha da ka Jaintia Hills Autonomous District Council (JHADC) na ka bynta ban tong ia ki dohkha mynta u snem 2020-2021.

Katkum ka notification NO. JHADC/MASF/M/10/2013/188 dated Jowai the 30th October,2020 kaba la pynmih da ka District Council kaba thmu ban die lilam biang ia ka wah Lukha bad kiwei kiwei ki wah ha rilum Jaintia.

U Ma Daiapherbha Lamare, Secretary 6 Shnong Wah Lukha Association, ula iathuh ba ka synjuk kala mana ba kino kino kiba thmu ban thied ia ka wah Lukha kin ym dei ban thied namar ka Association kan nym ailad ia ki ban tong ia ki dohkha, bad kan long ka jingduhnong ba khraw ia ki lada ki thied namar da lei lei ruh ka Association kan ieng beit ha ka nongrim ban pyrshah ia kane ka jingdie lilam ka council ia ka wah.

Kumba pynkynmaw ka Association naduh u snem 2018 kam juh ailad ia ka council ban die lilam ia ka Wah namar ba kane ka ktah ia ka kamai kajih ki briew kiba mlien ban khwai dohkha na kane ka wah.

Kumta ka Association ka kyrpad jur ia kito kiba thmu ban thied ia ka wah sngewbha ban nym thied ia ka ha une u snem ruh khnang ba ki briew ba shong ba sah harud jong kane ka wah kin ioh jingmyntoi na ka Wah Lukha.