Pyrshah u paidbah ïaka jingthung Acting Waheh Shnong ka JHADC ha Sohmynting
JOWAI: Ki nongshong shnong bad Dorbar shnong jong ka shnong Sohmynting da kawei ka sur haka jingialang kaba long haka 5 tarik Nailar 2019 kila pynpaw ka jingpyrshah kaba jur iaka jingithuh jong ka Jaiñtia Hills Autonomous District Council (JHADC) ia U Bravester Phawa kum u Acting Waheh Shnong katkum ka jingpynbna bala pynbna haka 1 tarik Nailar 2019 naka Administrative officer jong ka JHADC Jowai.
Ki paidbah nongshong shong bad ka Dorbar Shnong kala pyrshah jur ruh ia ka jingthmu jong une u Acting Waheh Shnong ban thung bad pynskhem iaki nongialam bad dkhot ka Executive body jong ka dorbar shnong da kaba shu jied lypa na iing ia ki briew la jong.
Ka jingithuh Acting Waheh Shnong jong ka JHADC ka long kaba khlem nongrim bad khlem ka jingtip lang bad khlem ka jingmynjur jong u paidbah nongshong shnong. Namar u ne u Acting (Bravester Phawa) u dei u nongialam ba ha khmat eh ban ujor sha ka JHADC pyrshah iaka Executive Boby ba thymmai jong ka shnong da kaba shu soi thok ia ki kyrteng jong ki nongshong shnong tang ban pynbun paid khnang ban ioh ujor.
La kynnoh ba ula pynbieit ruh iaki nongshong shnong ban soi kyrteng ban ioh grant na ki skhim sorkar.
Ka Dorbar Shnong Sohmynting namar kata ka pyrshah jur iaka jingthung Acting Waheh Shnong ha Sohmynting namar katkum ka Dorbar kaba la long ha ka 18 tarik Iaiong ka la dep jied Waheh Shnong ba pura jong ka shnong, u Lephing Pyrtuh haka jingdon lang U Dolloi jong ka Elaka Amwi ryngkat U Waheh Shnong, Secretary Shnong barim bad ki paid nongshong shnong jong ka shnong Sohmynting baroh kawei kala long kaba iaid beit iaid ryntih.
Ia kane karai jong ka Dorbar Shnong la dep ban phah jingtip sha ka JHADC da U General Secretary Shnong barim u Ma O Kya halor karai bala mynjur daka Dorbar Shnong. U Dolloi u la ai ka jingmynjur bad la phah iaka kyrteng jong u Waheh Shnong ba thymmai sha ka District Council khnang ban ioh iaka jingithuh bad ban ai Sanad, hynrei phewse la don pynban daka shithi ujor bala phah da ki briew bala don lang haka Dorbar bad ki long ruh ki dkhot committee jong ka Shnong.
Katba nangiaid ki sngi ka Dorbar shnong ka ap ia kata ka Sanad naka District Council hynrei kam shym ai satia mynta la saw bnai bad haka 1 tarik u Nailar 2019 ka JHADC ka ithuh pynban ia U Bravester Phawa kum u acting waheh shnong uba ki paidbah nongshong shnong ki khlem jied ban thung ia u ban bat ia kane ka kam. Kane ka pynpaw ba ka JHADC ka iuh roit iaka hok jong u paidbah bad ka bor ka iktiar jong ki dorbar shnong.
Naduh ba ngi la dep submit sha ka AO jong ka JHADC halor ka jingpynslem jong ki ban ai Sanad, ngi la leit ia kynduh ia U EM incharge political ki iathuh pynban ba don ki bor bahalor ba tuklar halor ka kam shnong kam thaw jong phi. Kumta haka 8 tarik Naitung 2019 ka JHADC ka la khot hajir ia ki katto katne ki rangbah tang ban dep rukom bad ki khlem wan sha shnong ban pynthikna ia ka rai jong u paid nongshong shnong.
Hangne ka paw shai ba ka don ka jingleh donbor bad iohruit iaka Dorbar jong ka shnong ka thaw hi baroh kawei da ka JHADC. Kane ka pyni ruh ba ka JHADC kam burom shuh iaka rai jong u paidbah lane ka Dorbar shnong.
Haka jingshisha shwa ban thung acting ia uno uno u briew ka JHADC ka la dei ban leit wad jingtip shwa naka shnong khnang ban nym mih ki huri hura hadien habud, hynrei ka JHADC kam shym la leh ia kaba donkam katkum ba ka dei ban leh. Ka la ithuh bad thung pynban ia u briew ba don jingpyrshah bad la leh ia kane tang ban pynpait ia ki kam shnong kam thaw jong ka Shnong kumjuh ruh ym shym la leh katkum ki riti ne constitution kaba mut haka jingiajied ia ki nongmihkhmat kiba jop ki dei kiba ioh bun paid bad ym ju don ki nongmihkhmat ki ban ioh shong shuki daka ka jingduna paid.
Lada ka JHADC kawan hi dalade sha Sohmynting la thikna kan lap ba ka jingbun paid ka leit sha karai jong u paidbah bala jied haka 18 Iaiong, 2019 hynrei namar ba ki sngewthuh ba kim ioh iaka jingkyrshan la shu thung katba mon tang ban ioh myntoi ki nongioh myntoi.
La kynthoh shuh shuh ba JHADC haka jaka ban pynbeit iaki kam shnong kam thaw haka rukom ba ka dei bad ban pyniasuk pynbha, hynrei dei maka (JHADC) pynban ka nong thombor bad leh donbor iaka rai u paid babun balang. Hato ka JHADC kam dei mo kaba peit iaka shongsuk shongsain ka bha ka mait ki shnong ki thaw? Ka AO bad EM ki ong ba don ka lyer iong lyer ngit ban wan khih phaloh halor ki kam shnong kam thaw ha Sohmynting, kumta kum ki nongshong shnong ngi kwah ban ioh jingshai kiei kita ki ka lyer iong lyer ngit ba wan haduh baka JHADC kam lah shuh ban pynbeit kumba dei.
Kane ka jingleh bor jong ka District Council pyrshah iaka Dorbar Shnong jong ka Sohmynting kaba la long haka 18 tarik Iaiong ka long pyrshah ia ka constitution jong ka Ri India kaba long ka Ri synshar paidbah. Kum ki nongshong shnong ba don ka jingkit khlieh naka bynta ka lawei ki khun ki kti jong ngi hadien habud bad da kawei ka jingmut ngi kum ki nongshong shnong ngi pyrshah jur ia kane ka jingleh donbor jong ka JHADC. Ka la dei ruh ka por ba ngin kyndit bynriew noh ban iatylli ban trei naka bynta ka bha ka miat haka im lang sah lang. Lada ngim kyndit bynriew bad lada ngi ailad kum ia ki ne ki jinglehdonbor kin poi ki por ba ki kam shnong kam thaw kin shah thombor da ki briew synshar donbor (dictator).
Khadduh iawai ka Dorbar Shnong Sohmynting ka khot ka wer iaki paradoh para snam kiba don ka jingkit khlieh naka bynta ka lawei ba phyrnai jong ki shnong ki thaw jong ka bri u hynniew trep hynniewskum ban wan sha khmat ban iatylli lang kawei ka sur ban jop iaki jingleh donbor ka JHADC.
Nongthoh: U Lephing Pyrtuh bad U Ling Pyrtuh| Sohmynting| West Jaiñtia Hills District
Facebook
Instagram
Youtube
Twitter
Leave a Reply