Pyrshang ka MeECL katba lah ban ym pyntreikam ia ka loadshedding ha ka Jylla: Mondal

Syllad | The Rising MeghalayaApril 30, 2024

U Myntri ka Tnat kam bording ka sorkar jylla u AT Mondal haka 29 tarik Iaiong, u la ong  ba ia mynta hi kim pat shym la pyntreikam satia ia ka loadshedding ne ka jingpynlip bording ha ka jylla bad kin pyrshang ruh katba lah ban kiar na kane.

Haba kren sha ki lad pathai khubor, u Modal u la ong ba ka MeECL ka la lah ban pynioh bording khlem kano kano ka jingshah pynthut ha ka por ba la pynlong ia ki eksam ba la pyniaid da ka MBOSE kumjuh ha k por ba la pynlong ia ka ilekshon Lok Sabha kaba dang shu dep shen ha ka jylla.

“Ngi sngewkmen shibun ban pyntip ba ngi la lah ban leh ia kane da kaba pynthikna ba kan ym don ka jingpynlip bording ne ka loadshedding,” ong u Myntri uba na bynrap ruh ba ki la pyrshang ia kaba bha ban khmih ba kan ym don satia ka jingpyntreikam ia ka loadshedding.

Nalor kata haba pyntip ba ka jylla ka shaniah tylli ha ki hydro power projek na ka bynta ka jingpynioh bording, une u Myntri u la ong ba kiba kum kine ki projek ki shaniah tylli ha ka jingioh slap, bad mynta u snem ruh kumba long ha ka snem ba la dep ka jingwan jong u slap ka kham slem khyndiat bad ngi shu kyrmen bad ka jingwan jong u slap ha ka jylla kan urlong noh ha kine ki khyndait taiew ki ban wan, bad lada kane kan urlong, kumta yn lait na ka jingpyntreikam ia ka loadshedding.

U la ong ruh ba ka rai jong u Myntri Rangbah ka Jylla ka long ba ngin pynioh ia ka bording kaba khlem kano kano ka jingshah pynthut.Ngi dang bteng ban trei halor kane ka bynta bad ngi kyrmen ba kane kan long kaba jop, u la bynrap.

Ha u snem ba la dep ka Jylla ka la sakhi ia ka jingpynlip boding kaba neh bun kynta, kata kaba long haduh 7 kynta ha ki jaka sor bad 9 kynta ha ki thain nongkyndong. “Mynta u snem, kat haduh mynta ngim pat shym la pyntreikam satia ia ka loadshedding.”

Haba kylli, u Myntri u la ong, “Ki jingjia pynlip bording ki la wan jia ha kiba bun ki daw, bad kine ki lah ban long namar ka jingjur lyer, ka jingpom pyrthat, ka jingiing u transformer, ka jingkhyllem jong ki dieng, ka jinghap ki waiar ba don ding bad kiwei pat kaba pynlong ia ki bor ba dei khmih ba kin hap ban pynlip ia ka bording na ka bynta ban maramot.