Pyrshang ka Sorkar ban pyndep noh ia ka jingker sainar ha khappud ka India-Bangladesh: CM

Syllad | The Rising MeghalayaJanuary 17, 2025

U Myntri Rangbah ka Jylla u Conrad K Sangma ha ka 16 tarik Kyllalyngkot u la pyntip ba na ka liang ka sorkar ka la pyrshang ban shim ia baroh ki lad ki lynti ban pynbeit noh ia ka kam ia die ia thied jaka khnang ban plie lynti na ka bynta ban pyndep noh ia ka jingker sainar shiah ha khappud ka India-Bangladesh.

Katkum ka jingpynpaw ka jong u, u la ong ba kumba 50-60 km na ka 443 km ki jaka khappud jong ka ri ki dei ki bym pat ker sainar namar ka jingpyrshah na ki nongshong shnong.

Haba kren sha ki lad pathai khubor u CM u la ong, “Sa shisien pat ha kine ki jaka, ki don ki jingsngewkhia ba la pynpaw da ki trai shnong. Ka long kaba shem shitom ha ka jylla jong ngi namar ka riti bat khyndew, bad kumta ngim lah satia ban shu leh da ka bor bad ngi donkam ban shim ia ka jingiatreilang jong ki paidbah.”

“Ban kren ia ki jingshisha, ka sienjam ba ka sorkar jong ngi ka la shim ka long beit ban ioh ia ka jingshaniah na ki paidbah katba ngi dang pyrshang ban pyniaid shakhmat. Hooid, ki lah ban don ki por ba ki lah ban don katto kane ki jingbym ia sngewthuh jingmut hynrei barabor ngi shim beit ia ka jingshaniah jong ki paidbah. Halor kane ka phang ruh kalong kumjuh bad ngi pynsngewthuh ia ki ba ka long kaba donkam. Ngi iatrei ryngkat bad ki bad ka MHA bad kane ka dang iai bteng hynrei ngim pat lah ban weng ia kane ka jingeh ia mynta hi. Ka dei ka jingsngewkhia. Ngi la shim ia baroh ki sienjam katba lah bad nga kyrmen ba ngin shem ia ki lad ki lynti ban lah ban pyniaid shakhmat,” ong u Myntri Rangbah.