Pyrshang ka Sorkar ban pynlait na ka jingpynduh bording: Mondal

Syllad | The Rising MeghalayaFebruary 7, 2024

U Myntri Sorkar uba dei khmih ïa ka tnad bording, u Abu Taher Mondal haka 6 tarik Rymphang u la ong ba ka jylla ka don hapdeng ka jingbit jingbiang haduh mynta ha kaba dei bad ka jingdonkam iaka bording.

Ha ka jingkren bad ki nongthoh khubor na ka liang u Mondal u la ong “Ka jingpynmih bording ka dei kaba dang shaniah tylli na ki hydro power project bad ka bhah ba ïoh lyngba ka tnad sam bording jong ka sorkar pdeng, hynrei ïa mynta ka jylla ka don hapdeng ka bit ka biang bad kam pat donkam bording satia ban shim na kiwei pat”.

U la ban bad ong “Wat la katta ruh manla ka taïew ngi ju pynlong iaka jingialang bishar kam bad pyrshang ban thew ban woh ba kumno ngi lah ban pynduna ka jingpyndonkam khnang ban lait na ka jingpynlip bording bad ka jingsangeh ban sam bording ne shutdown”.

U Myntri u la pyntip ruh ba la pyntreikam ïa ka projek  kaba don ha Riangdo West Khasi Hills kaba lah ban pynmih 3 megawatt ka bording ban pyndap shuh halor ka jingpyndonkam tam ïa ka bording.

“Ki don ruh ki expert kiba la pynsngew ba ngi lah ban kyntiew ia kane ka projek sha ka jingpynmih bording haduh 6MW bad ngi dang khmihthuh ha kane ka liang” la ong u Myntri.

U Mondal ula ïathuh ruh ba ka la don ka jingpynkhreh halor ki kaiphod kiba bniah ba ïadei bad ki projek pynmih bording ba la thmu ban pyntreikam halor ka jingshna ki jaka pynmih bording kiba rit. “Mynta ngi hap ban bishar bniah la ka lah ban long bad kumjuh ruh halor ka jinglut jingsep,” la bynrap u Mondal.

Ula pyntip ruh ba ka la khot tender ban pyntreikam ïa ka Chief Minister’s Solar Mission.

“Ngin sa peit kumno kan long. Kane kam dei satia halor ki solar park lane ki solar plant. Hynrei ka dei ka jingbuh ki solar panel ha ki tnum ïingbriew ha kano kano ka jaka kaba sngewbiang ki briew lait noh ka nongbah Shillong bad katto katne ki jaka jong ka, kiwei ki jaka ka jylla ki dei kiba shah sngi bha,” la ong u Myntri.