Pyrshang ka tnat Telecom bad ka NDMA ia ka Cell Broadcast Alert System

Syllad | The Rising MeghalayaOctober 30, 2023

Ka Department of Telecommunications (DoT) ryngkat ka jingiatreilang bad ka National Disaster Management Authority (NDMA) kala pyrshang ban pyntreikam ia ka Cell Broadcast Alert System haka 30 tarik Risaw da ka jingthmu ban iarap halor ki lad aijingtip ba kyrkieh haba jia kino kino ki jingjia shah pynjulor ha ki bor ka mariang bad kiwei pat bad ban pynthikna na ka bynta ka jingshngain jong ki nongshong shnong.

Ia kine ki Cell Broadcast Alert System la pynlong ha kawei pa kawei ka Telecom Service Provider. Ia kine ki jingpyrshang yn bteng ban leh na kapor sha ka por ha ki bynta bapher bapher jong ka ri khnang ban khmih halor ka jingtreikam bad ka jingseisoh ha ki lad aijingtip ba kyrkieh lyngba kine ki kor ba la pynkhreh ha ki Mobile Operator bapher bapher kumjuh ha ki Cell Broadcast Systems.

Kine ki Cell Broadcast Alert System ki dei ki bynta jong ka technology kiba pynlah ia ngi na ka bynta ban phah ia ki message kiba donkam kyrkieh ha ka por kaba biang haba don ki jingjia shah pynjulor ha ki bor ka mariang bad kiwei pat sha baroh ki mobile phone kiba hap hapoh kito ki jaka, kata la ka long ba ki ioh ioh pdiang ia ki message ki dei ki nongshong shnong ne kiba shu wan poi.

Kane kan pynthikna ia ki jingtip ba donkam kyrkieh ba kin poi sha ki ba bun bah ki briew katba lah ha ka por kaba biang. Ia kine la pyndonkam da ki tnat sorkar bad ki tnat aijingshakri ba kyrkieh ban aijingtip sha ki paidbah halor ki jingsyier jingma bad ban pyntip sha ki ha kiba kum kine ki khep ba don jingma.

Ia kine la ju pyndonkam ban ai ia ki jingtip ba kyrkieh, kata kum ha kaba iadei bad ka jingma na ki bor ka mariang, kum ka jingmaham halor ka jinglah ban khie Tsunami, Jingshlei Um, Jingkhynniuh Jumai bad kiwei pat, kumjuh ia ki jingpyntip kiba iadei bad ki jaka kiba shngain na ka bynta ki paidbah, ki jingpyntip kiba iadei bad ka jingpynkynriah ia ki briew bad kiwei pat ki lad jingtip ba kongsan.

Ha kane k por ba pyrshang ne leh ia ka test, ki briew ki lah ban ioh pdiang ia ki emergency alert ha ki mobile ki jong ki. Ka DoT ka pynthikna bad kine ki emergency alert ki dei ka bynta jong ka plan ha kane ka jingpyrshang bad ka bym shym la thew shisha ia ka jingdonkam ba kyrkieh.

Man kawei pa kawei ka test alert kan kdew shai ba ka dei tang ka test message khnang ban ym pynartatien. Ia kane ka jingpyrshang la pynkhreh la pynlong 30 tarik Risaw sngi Nyngkong ha ka jylla, hynrei kane ka shong eh ha ka jinglong ba la pynkhreh ia ki kor ki bor bad ba ka lah ruh ban don ka jingpynkylla ha kaba iadei bad kane ka jingpyrshang ha ka khyllipmat kaba khatduh.