Pyrshang ki seng sain pyrthei ban wanrah ka jingiapait iapra bad ialap pyrshah Sorkar: CM

Syllad | The Rising MeghalayaFebruary 15, 2025

U Myntri Rangbah ka Jylla Meghalaya bad National President ka National People’s Party (NPP), u Conrad K. Sangma u la ong ba ki don ki seng sain pyrthei kiba pyrshang ban wanrah ia ka jingiapait iapra, ki jingialap pyrshah sorkar bad ban pynmih ia ki jingkynthoh kiba khlem nongrim.

Ia kane u CM u la pynpaw ha ka jingleit ialap elekshon ha ka 13 tarik Rymphang sha kiba bun tylli ki shnong kiba hap hapoh Mawkyrwat constituency ban pan jingkyrshan ia u kyrtong ka party uba dei ruh u MDC ba myna u Bah Carnes Sohshang na ka bynta ka elekshon sha ka Khasi Hills Autonomous District Council (KHADC) ka ban long ha ka 21 tarik Rymphang.

Haba leit iashim bynta ha ki jingialang ha ka shnong Shngimawleiñ, Mawthawpdah, Umdohlun, Mawpat, Mawlangwir, Mawkyrwat, Rangmaw bad Sakwang u Conrad u la ong, “Kane ka thain ka dei kaba la shah ieh bein mynta la slem bah. Ngi kum ka party bad ka sorkar ngi kwah ban wanrah ia ka roi ka par kaba phi dei hok ban ioh. Na ka byna jong nga khnang ban lah ban trei bad ban wanrah ia ki kam pynroi nga donkam ia ka kynhun, nga donkam ia ki briew, nga donkam ia ki lad ki lynti. Dei na kata ka daw kane ka elekshon ka ban wan ka long kaba kongsan na ka bynta kine ki shnong bad ka constituency.”

Haba kren halor kynhun kiba kynthoh pyrshah, u CM u la ong, “Ngam kwah ban ong ei ei shaphang jong ki namar ngam don ka jingngeit ha ka kam sain hima kaba kynthoh pyrshah. Kaei kaba nga kwah ban pynpaw sha phi ka long ba hadien ba la kut ka elekshon pynbna ia ka result ha ka 24 tarik Rymphang, baroh ki seng sain pyrthei kiba ialap bad kynthoh pyrshah sorkar kin ym don shuh hangne, bad ngin long biang kum ki riew paidbah, kum ka shnong bad kum ka constituency kiba khmih lynti ba ngi dei ban ioh la ka jong ka CHC, ki surok bad kiwei pat ki kam pynroi.”

Une u khliehduh ka NPP u la kyntu ruh ia ki paidbah ban buh hakhmat eh ia ka roi ka par bad ban vote ia ka party kaba lah ban wanrah ia kita baroh. “Ym don kiwei pat hynrei ka party kaba lah ban leh ia kata bad wanrah ia ki kam pynroi ka dei tang ka NPP. Na kata ka daw kane ka elekshon ka long kaba donkam bha,” u la ong.

U Conrad u la kyntu ruh ia ki paidbah ba kin ai ka jingiatreilang da kaba ong, “Kane ka elekshon ka ban wan kadei ka lad ka kabu na ka bynta jong ngi ban wanrah ia ka jingkylla ha ka constituency bad ha ka thain bad kumta donkam ban iatreilang ryngkat ryngkat bad ka sorkar.”

U la ong ruh ba ka sorkar NPP kan iatreilang bad ki paidbah la ka long ha ka por kaba kmen ne ka por ba sngewsih khnang ban pynthikna ia ka jingkylla bad ka jingwan jong ka roi ka par.

Shuh shuh u Conrad u la pyrto ia u Bah Carnes halor ka jinglong ba sngewrit jong u bad ong, “Nga kyrpad ia phi baroh ba phin peit ia ka jinglong jong u nogialam. U Bah Carnes u don ia baroh ki jinglong kum u nongialam uba bha, uba sngewrit bad uba lah ban ai ka jingshakri. Nga sngew ba maphi baroh phi dei ban ai ka jingkyrshan kaba pura na ka bynta jong u.”