Pyrto ka BCCI ia ka jinglong jingman ki madan ialehkai Cricket ka MCA ha Polo

Syllad | The Rising MeghalayaNovember 4, 2024

Ka jingpynkhreh ia ka jingialehkai kaba ar jong ka Ranji Trophy 2024-25 Elite Group A ha madan MCA ha Polo ka la iaid shakhmat, ha kaba ha kane ka kynti ka kynhun ialehkai ka Meghalaya kan mih ia aireng pyrshah ia ka Jammu and Kashmir ka ban sdang naduh ka 6 tarik u Naiwieng 2024.

Kumba ka long ban ioh ia ka lad ban wanrah ia kane ka lympung ialehkai ha la iing kam long satia ka kam kaba suk, katba hangne donkam ia ki riew shemphang bad ki nongtrei (curator & ground staff) ba kin hap ban trei minot da ki bun bun ki bnai, khnang ban lah ban pynlong ia ka madan ban pynialehkai (pitches) kaba biang nadong shadong ha kaba ha kane ka kynti kaba mynta ka la ioh ia ka jingiaroh bad pyrto na ki bor ba dei khmih jong ka BCCI.

“Ka long ka khyllipmat kaba  kaba sngew sarong  ban ioh ia ka jingpyrto na ka BCCI naduh ki Neutral Curators, Match Referees, Umpires bad kumjuh na ki nongialehkai na kiwei pat ki jylla, kaba kane ka madan ki don ia katta ka jait madan kaba tip kum ka Table of 9 wickets (pitches) ” la pynpaw u President ka MCA u Naba Bhatacharjee, ha kaba u la kam shuh shuh ba kitei baroh ki niew bad buh ia kane ka madan hapdeng ka kyrdan kaba 7 ne kaba 8 ha ka ri hi baroh kawei.

Nalor kata u Naba u la pyrto bad ainam ai burom ruh ia la u jong u para dkhot katta u bah Peter J Lamare (BCCI-qualified curator) bad ia u Pobitro Rabha (chief groundsman) bad ki briew kiba la donkti lang ban lah ban saiñdur bad pynlong ia kane ka madan kum ba ka dei ba kan long.

Kumba ka long ka Meghalaya ka la lah ha kaban pynlong lai tylli ki jingiakhun, kaba ka kynhun ialehkai ka jylla, ka la mih madan ban aireng pyrshah ia ki kynhun kiba la paw bad tbit bha.

Dei na kine ki lai tylli ki jingiakhun ba la shem bad iohi ba ka kynhun ka jylla ha baroh ki ar kylla jong ka jingialehkai ba ki la lah ban kamai 461 ron, kaba pynpaw shai kdar ia ka dak jong ka jingsdang tbit bad skhem bha ka batting, kampher wat lada dang don bun ki bynta kiba kum ka kynhun kan dang hap ban trei shitom na ka bynta ban pyntbit ne ban pynjanai bha ialade.

Kumta mynta ki khmat kin phai pat sha ka sngi Balang jong ka taiew, kaba hangne ka suin bneng ka la kylla, ha kaba yn ia peit bad iohi ba haduh katno kine ki madan kin ialam, kaba lada shu ia swar lah ban ong ba kan ailad lang ia ki batsman bad kumjuh ia ki bowler.