Pyrto ka BJP ia ka Sorkar Pdeng ba mang 1,241 klur na ka bynta ka surok Phulbari-Tura

Syllad | The Rising MeghalayaDecember 16, 2023

U Nongaiktien ka BJP Meghalaya, u Bah Mariahom Kharkrang u la ai khublei ia u Myntri ka Sorkar Pdeng uba khmih ia ka Tnat Road Transport and Highways, u Nitin Gadkari kumjuh ia u Myntri Rangbahduh ka Ri u Narendra Modi halor ka jingmang kaba T.1,241 klur na ka bynta ban pynbha bad pyniar ia ka bynta jong ka surok hapdeng ka Phulbari-Tura ka bynta ka National Highway 127B hapoh ka jylla.

Ia kane ka surok ba mynta hapdeng ka Phulbari-Tura haka bynta ka National Highway 127B yn kyntiew noh sha ka two lane ha ryngkat baroh ki jingdonkam bad ka ban pynsuk shibun ban leit sha Tura kaba dei ka headquarter jong ka district West Garo Hills bad kiwei pat ki bynta jong ka jylla lyngba ka surok bah NH-217 (Tura-Dalu) bad Tura-Jengjal-Rongjeng-Nongstoin-Shillong.

U Bah Kharkrang u la ong, “76 snem jong ka jingioh jinglaitluid bad 50 snem jong ka jingioh jylla ba pura, hynrei ki sorkar pdeng kiba la leit noh ki la kyntait ia ka jingdawa ka Meghalaya ha kaba iadei bad ka jingdonkam ia ki surok kiba biang. Kawei hadien kawei ka sorkar ki la kyntait ia kane ka jingdonkam ba kongsan jong ki paidbah bad ruh ka jingpyniasoh ha ki kam khaii pateng hapdeng ki jylla jong ka thain.”

“Ngi sngew sarong shibun namar ha kaba khatduh ngi don hapoh Delhi ia ka sorkar kaba sngewthuh ia ki jingdonkam ka jylla jong ngi bad kaba trei borbah da ka jingthmu ban lah pat ban weng ia kine ki jingeh,” ong u nongaiktien.

Shuh shuh u la ong ruh ba u PM Modi u dei u paralok jong ka thain Shatei Lammihngi (North East) naduh ka sngi kaba nyngkong, ha kaba la sakhi ruh ia kane lyngba kiba bun bah ki kam pynroi hapoh ka thain North East.

U Nongaiktien u la ong ruh ba kane ka mang tyngka ba dang shen kan nangpynskhem ba ngi don ia ka sorkar kaba iajan bad ka Meghalaya hapoh Delhi. “Ka Meghalaya BJP kan dang iai bteng ban trei ban pyniar ia ki kti jingiarap jong u Modi bad ban pynthikna halor ka sorkar jong u kaba iajan bad u paidbah.”