Pyrto ka HNLC ia ka jingkhot iakren ka Sorkar, ym sngewtynnad ia ka jingkren u Dy CM

Syllad | The Rising MeghalayaJune 15, 2024

Haba pyrto ia ka jingkhot ka Sorkar Jylla sha ka jingiakren iasuk, ka Seng kieng atiar Hynniewtrep National Liberation Council (HNLC) ha ka 14 tarik Jylliew ka la ong ba kam sngewtynnad ia ka jingkren jong u Symbud Myntri Rangbah ka Jylla uba khmih ia ka Tnat kam pohiing (Police) u Bah Prestone Tynsong.

Ka HNLC ka la kam ruh ba ka jingshah kem ba dang shen jong ki laingut ki dkhot jong ka kan pynduh mynsiem shibun ia ki nongshong shnong ka thain khappud ha Block-2, ia kiba la kynnoh ba ki la ngat ha ki jingshah dawa pisa jubor ha ki lehnoh kiba dei na Assam.

 “Ngi pyrto ia ka jingkhot jong u Myntri kam pohiing u Bah Prestone Tynsong ia ngi sha ka jingiakren iasuk, hynrei ngim pdiang satia ha ka rukom kumba u la kren,” ong u kyrwoh lyngba u General Secretary cum Publicity Secretary ka Seng u Bah Sainkupar Nongtraw.

“Ka Sorkar India kam kwah satia ia kino kino ki nong India ba kin leit iakhun na ka bynta ka Russia hapoh Ukraine. Lada ka sorkar ka sngewkhia na ka bynta ki nong India kiba iakhun na ka bynta kiwei pat ki ri, ngi ka HNLC ngi sngewkhia na ka bynta ki khun ka Bri u Hynniewtrep kiba iakhun na ka bynta ka ri India hapoh ka Sorkar Pdeng bad sorkar Jylla. Ka la dei eh ka por ia ki nongshong shnong ki jong ngi ha ka tnat shipai bad pulit ba kin sngewthuh ba ka jinglen lade ka jong ki na ka bynta ka jinglaitluid jong ka ri India ka dei tang ka jingpynthame bad ialam bakla,” u la ong.

Une u nongialam ka HNLC u la ong ruh, “Ngi la iakhun pyrshah ia ka ri ka jong phi bad ia ka sorkar jong phi mynta la bun phewtylli ki snem, sngewbha wat khein troin ia ngi. Ngi la tip bha ia ka jinglong jong ki riewsain hima, wat pyrshang ban shukor ia ngi. Ngim dei kiba biej ki ban shu shah pynngop ha ki jingkular thok ki jong phi.”

Da kaba kynthoh ia ka Tnat pule ka Jylla halor ka jingshah kem ki dkhot jong ka, une u heh ka HNLC u la ong ba kine ki laingut ki dkhot ka HNLC kiba la shah kem na Ri Bhoi ki dei na ka thain Block 2, ka jaka kaba don hapdeng ka jingiakynad pud ha kaba ka sorkar Assam na ka por sha ka por ka ju wan kurup jaka beain.

“Ki la don ki jingjia ha kaba ki pulit ka Assam ki la leh ia ki kam thombor pyrshah ia ki nongshong shnong kiba dei ki Khasi, ka jingshah pynjot ki jngthung jingtep ha ki briew ka Tnat Forest ka Assam, ka jingdawa pisa jubor da ki lehnoh na Assam kiba la pynlong ia ka seng HNLC ba kan iarap ban khmih lem na ka bynta ka jingshngain bad bha ka miat jong ki nongshong shnong kiba shong ba sah ha kane ka thain,” u la bynrap.

Hynrei, u la ong, “Ka long kaba sngew bynniaw ba ka jingshah kem noh ki dkhot jong ngi ha ki bor sorkar na kine ki thain ka la ktah jur ia ki nongshong shnong ha kane ka jaka.

U Bah Nongtraw u la ong ruh ba man ka por ki dkhot jong ka Seng ki la shah kem noh ha ki bor pulit da kaba kynnoh donkti ha ki kam bymman bad ki kam dawa pisa, hynrei da kaba leh klet ia ki nongkam bymman bad ki kam dawa pisa kiba la leh da ki briew ha ki uniform kiba pynkhein ia ki hok longbriew manbriew jong ki nongshong shnong.

Nalor kata u la ong ba ka jingsakhi ia kine ki kam bamsap hapoh ka tnat pulit ki la paw ruh lyngba ka jingphla jong u Bah Iangrai uba dei u heh pulit bad kaba pynpaw halor ka jingdonkam ban don ia ka jingai jingkhein bad ka jingdonkam ban pynkylla iaka rukom treikam.

“Ka imlang sahlang ka jong ngi ka la shah leh shiliang ha kijuh ki ain bad ha kito kiba bam smai ban bat ia ka ain,” ong u Bah Nongtraw da kaba bynrap ba “Tang myna ka taiew ngi la sakhi lyngba ki lad pathai khubor shaphang uwei u rangbah Khasi uba la don 70 snem rta uba na ka shnong Pyrdiwah uba la shah kem ha ki pulit bad uba la shah phah dait da u ksew jong ki pulit.Ka long kaei kaei kaba sangsot ban iohi ba u riew rangbah un shah leh ha katei ka rukom. Katba ki riewshimet kiba dei ki bar jylla kiba leh ia ki kam sniew haba ki shah kem la leh bha ia ki bad kaba lam sha ka jingiasuk  bad ban pynkut noh ia ki case pyrshah ia ki,” u la ong.

U la ong ba kane ka pyni shai kdar ia ka jingiadei ka bym khuid hapdeng ka Judiciary System bad ka Political Home Department ha Meghalaya,” ula kynnoh.

Shuh shuh u Bah Nongtraw u la ong ruh ba watla ka long ka dak ka jingjop ba ka Kong Nongrang ka dei ka longkmie Khasi kaba nyngkong eh ka ban bat ia ka kyrdan DGP, hynrei ka don pat ka jingsngewkhia ba ka lah ban shah ialam bakla bad shah pyniaid ban shakri na ka bynta ka bha ka miat jong ki bar jylla bad ki nongialam Garo bad ban leh bym khein snep ia ka jinglah jong ka ban wanrah ia ka jingkylla kaba shisha.