Pyrto u CM ia ka sorkar u Modi halor ka jingpyllait ia ka pisa kaba kot palat 1000 klur ia ka Meghalaya

Syllad | The Rising MeghalayaJune 12, 2024

U Myntri Rangbah ka Jylla u Conrad K Sangma ha ka 11 tarik Jylliew u la pyrto ia ka jingshim rai ka sorkar bathymmai ba la ialam da u Narendra Modi na ka bynta ban pyllait ia ka pisa kaba kot haduh T.1071.90 klur na ka bynta ka Meghalaya kaba long shibynta ka jingbhah ia ka khajna sha ki Jylla hapoh ka ri.

“Nga kwah ban ai khublei ia ka Sorkar India halor ka jingpyllait ia kane ka song pisa kaba T.1071.90 klur kum ka jingsam ia ka bhah ia ka khajna ka ban pynlong ia ka sorkar Jylla ba kan lah ban pyntrei ia kiba bun ki kam pynroi kynthup ia ki prokram kiba iadei ban kyntiew ia ka imlang ka sahlang,” ong u Conrad.

U CM u la ong ruh ba kane ka dei ka jingpyni ia ka sienjam kaba kongsan jong u Myntri Rangbahduh ka ri bad bad ka Myntri Pla Tyngka bad ka dei ka lynti kaba khraw shibun ban sdang ia ka sorkar kaba thymmai.

Nalor kata u la bynrap ruh da kaba ong, “..Balei kane ka long kaba kongsan ka namar ka jingpyllait ar instalment na ka jingbhah ia ka khajna na ka bynta ki jylla bapher bapher jong ka ri.Kumta man u bnai, ngi ju ioh tang shi instalment, hynrei ka sorkar India ha kawei ka rukom ka la ai ia ka bonus ia kawei pa kawei ka jylla da kaba pyllait ar instalment.Kumta ia kane kan ym khate shuh na ki instalment ki ban wan hadien habud, hynrei kine ki dei beit ki jingai sngewbha ne bonus kiba long ka jingai jingmyntoi kaba ar shah.”

Ka Meghalaya kala ioh ia ka song pisa kaba heh tam na ki Jylla ka thain shatei lammihngi lyngba kane ka bhah hadien ka Assam bad ka Arunachal Pradesh.