Pyrto u Lat ka Jylla ia ka jingphylla jong ka ‘Law Kyntang; ka dei ka “Bneng ha Pyrthei”

Syllad | The Rising MeghalayaSeptember 4, 2024

U Lat ka Jylla u CH Vijayashankar u la kubur ia ka jingitynnad jong ka mariang bad ki sawdong sawkun jong ka Meghalaya da kaba ong, “Ka dei ka bneng ha pyrthei,” kata hadien ka jingleit jurip ia ka ‘Law Kyntang bad ka Khasi Heritage Village kaba don ha Mawphlang ha ka 3 tarik Nailur.   

Ha kane ka jingleit jurip ba la khot sngewbha da ka Khasi Hills Autonomous District Council (KHADC) la pdiang sngewbha ia u Lat ka Jylla da u CEM ka Khasi Hills Autonomous District Council (KHADC) u Bah Pyniaid Sing Syiem, Dy. CEM Bah PN Syiem, u MLA/MDC Bah Charles Marngar, Chairman ka KHADC Bah Lamphrang Blah, u Nongialam ka Liang Pyrshah u Bah TW Chyne, ki Executive Member, ki MDC, u Lyngdoh ka Hima Mawphlang bad kiwei kiwei.

Ha ka jingkren u Lat u la pyrto ia ki trai shnong riewlum bad ia ki tnat kiba khmih halor ka jingpynneh pynsah ia ki jingdon jingem bad ka kolshor tynrai da kaba shim ia ki kum ki briew kiba don shisha ka jingkitkhlieh bad ka jingieit ia ka mariang bad kiba hikai ruh ia ka pyrthei ia ka dor ka jong ka. 

U la ia nujor ruh hapdeng ki riti dustur jong ka jaka kaba u wan bad ka Meghalaya da kaba shim ia kane ka Jylla kum ka “Bneng ha ka Pyrthei” namar ka jingriewspah ha ka liang ka kolshor bad ka jingdon ia ka mei mariang kaba itynnad.

U Lat u la pynpaw ruh ia ka jingdonkam kaba kongsan ban pynneh pynsah ia ki khlaw ki btap da kaba pynksan ba ki khlaw kim dei tang ka tyllong jong ka jingpyniaid beit ia ka mariang hynrei ki bat ruh ia ka jingmut kaba jylliew ha ka kolshor bad ha ka liang ki dawai dashin. “Ka Meghalaya ka dei ka shlem jong ki dawai kynbat,” u la ong da kaba kyntu ia ki nongshong shnong ba kin btengban aijingiada bad ban sumar ia kine ki jingai ba kordor jong ka mei mariang.

U Lat u la iamir jingmut ruh bad ki trai shnong kumjuh bad ki kynhun Self Help Group jong ki kynthei ha kaba u la pynpaw ïa ka jingsngewnguh kaba khraw ia ka kolshor ieit mariang kaba hiar pateng jong ka jylla Meghalaya.

Nalor kata u Lat u la iaroh ruh ia ka rukom long ka imlang sahlang kaba ai jait sha ka kynthei ha ka jylla Meghalaya, ha kaba ki kynthei ki don ka bynta ba kongsan ban pynneh ia ka jingiatylli ha ka imlang sahlang bad ban pynsah pateng ia ki riti dustur. U la khot ruh ia ki samla ban bat ia ki jinglong tynrai ba la ai da ki longshwa manshwa, da kaba ban jur ba kane ka dei ka lynti ban tei ia ka imlang sahlang kaba kham bha.

U la ban jur ia ar tylli ki bynta ba kongsan na ka bynta ka roi ka par jong ka jylla, kata ha ka liang ka pule puthi bad ka jingkyntiew ia ki kam karkhana. “Ka jingnang jingstad ka dei ban long kaba lah ban ioh da baroh, bad ngi dei ban pynthikna ia ka jingroi jong ki karkhana rit bad ki karkhana rep, kiba long kiba kongsan na ka bynta ka jingpynkupbor ia ka ioh ka kot jong ki shnong ki thaw jong ngi,” u la ong.

Ha kajuh ka por u Lat u pynthikna ruh ia ki paidbah ka jylla Meghalaya ia ka jingkyrshan ba pura jong u, da kaba ong, “Kano kano ka jingiatreilang kaba phi wad na u Raj Bhavan, ngi don ryngkat bad phi.

Ha kane ka sngi u Lat u la leit jngoh ruh ia ka Public Health and Engineering – Inspection Bungalow bad iakynduh ia ki heh  ka Tnat PHE ha kaba la pyntip sha u halor ka skhim sam um jong ka Great Shillong Water Supply Scheme bad ki la iakren ruh halor ki lad ki lynti ban kyntiew bad pynbha shuh shuh ia ka rukom sam umbam umdih ha ka jylla.