Pyrto u Lat ka Jylla ia ka Shillong Law College ha ka jingiaid lynti kaba 60 snem jong ka

Syllad | The Rising MeghalayaSeptember 27, 2024

U Lat ka jylla u CH Vijayashankar ha ka 26 tarik Nailur u la pyrto ia ka Shillong Law College halor ka bynta kaba ka la shim ban saindur ia ka pyrkhat pyrdain bad ban noh synniang halor ki kam bishar bad ki kam ain hapoh ka Jylla Meghalaya.

Haba aijingkren kum u kongsan ha ka jingrakhe ia ka Diamond Jubilee jong ka College, u Lat ka Jylla u la ai khublei kyrpang ia ka Shillong Law College halor ka jinglah ban kynjoh sha ka 60 snem ka jingiaid lynti ban kyntiew ia ka pule puthi ha ka liang ki kam kiba iadei bad ki ain ki kanun.

Kumjuh haba pdiang ia ki jngeh bad ki jingkyllain ha ki kam ain ha kane ka juk kaba mynta, u Lat u la kyntu ia ki samla pule ba kin iai bat bad pynneh ia ka nongrim jong ka hok, ka jingmar ia ryngkat lang bad ka jinglong janai ha ki kam ki jam kiba kin sa aijingshakri ha ki sngi ki snem ki ban wan.

Ha kane ka sngi la ia don lang ruh ki Symbud Konsan kiba kynthup ia u Justice HS Thankhiew, Justice Wanlora Diengdoh bad  Justice B.Bhattacharrjee jong ka Iingbishar High Court ka Meghalaya.

Nalor kata u Lat u la pynshlur ruh ia ka College ba kan bteng ia ka jingkut jingmut ban kyntiew ia ka jingnang jingstad bad ban pynmih ia ki riew shemphang ha ka liang ki kam ain ki ban noh synniang sha ka imlang ka sahlang.

U la pynpaw ruh ba ki briew kiba pule ia ka ain kim ju shongthait bad ki bteng ban shakri ia ka ri bad ia ka imlang sahlang ha shi lynter ka jingim ka jongki.

Ha kane ka sngi la sakhi ruh ia ka jingiadon ryngkat lang ki riew pawkhmat ha ki kam ain, ki samla pule barim jong ka College, ki nonghikai, ki samla pule, ki heh ki hain na kylleng ka jylla bad kiwei kiwei.