Pyut ki mar rep ba twa khyndew bad shlei um ka surok ha khappud India Bangladesh

Syllad | The Rising MeghalayaJuly 12, 2020

Ka jingwan ther jur u slap ha ki shnong bapher bapher ha ki thain khappud India Bangladesh kala ktah jur iaki paid nongrep namar ba la pyut lut ki mar rep ha ki shnong kiba hap East bad West Jaintia Hills namar ka jingtwa surok bad shlei um ki surok.

Kane ka jingtwa surok kala jia ha surok Borkhat-Muktapur Alamrem, katba ka jingshlei um pat ka jia ha ki bynta ka surok hajan ka shnong Kharkhana ha wah Amlati bad ka wah Amsakyrchoh ha kaba ka wanrah iaka jingsahkut ki kali.

U Deimonmi Bareh, Assistant General Secretary ka shnong Kharkhana, ula ong ba kane ka jingther slap haka saw sngi saw miet kala ktah iaka leit ka wan ki paidbah, khamtam iaki nongrep kim lah satia ban pynpoi iaki mar rep sha ki iew ki hat bym lait ki kali motor ban leit ban wan na ka jingtwa khyndew bad shlei um.

Ula ong shuh shuh ba kane ka jingjur ka jingjot bad julor ka surok ka dei namar bala iehshrah iaka surok la bun bun snem sha kane ka thian wat hadien ba ki shnong bapher bapher kila ujor sha ka sorkar bad ki nongmihkhmat naduh u MLA ka thain ba Lahkmen Rymbui, Myntri Sorkar bad u Deputy Chief Minister ka Sorkar Prestone Tynsong, hynrei la leh kuman iaka jingud jingnam u paidbah ka thain.

“Kine ki shnong khappud ba shah ktah na kane ka jingwan ther jur u slap ki kynthup iaka Huroi, Hingaria, Kwator, Natbor, Borghat, Kharkhana, Pasadwar, Lumpyngngad, Kamsing bad kiwei ki shnong khappud.

Baroh kine ki shnong kidei kiba im da kaba rep kwai, tympew, ki sohtrun, kait bad kiwei kiwei ki mar rep ki la pyut lut.

Kane ka jingsniew tasam surok ka dei haka surok Borghat, Kharkhana, Muktapur, Syndai ter ter shaduh Amlarem,” la ong u ma Deimonmi Bareh.