Rah biang ka Sabahmuswang ya ka Republic Day Cup 2024

Syllad | The Rising MeghalayaJanuary 27, 2024

Ka yakop kynjat bol iong ki khynnah wa em hei rta wa 13 snem chapoh kawa tip kam ka Republic Day Cup wei kawa da peit da pynlai da ka West Jaintia District Sports Association (WJDSA) haka 26 tarik Duiatra da poi ko cha wakut ha madan Kiang Nangbah Stadium heiwa ka Sabahmuswang Sports Club wa ka Football Academy of Meghalaya daman ki team ki wow yaknieh yei nam ha kani ka sngi.

Ya kani da pynman hei khrehlang ka ophis u Deputy Commissioner, West Jaintia Hills DIstrict.

Chwa wow ioh ki waboon walang u sakhi yei pyntawbuit pyntawbor pyntawsap ki ar liang ha madan da em ka yalang yahkhmat watbian hei pynlai u Patrick Lamare, Vice-President WJDSA wei da emlang leh da u Wailadmiki Shylla, MLA, u BS Sohliya, IAS, Deputy Commissioner, West Jaintia Hills, u EMH Passah, Working President WJDSA, u Lammat-O Laloo, General Secretary WJDSA, u Daniel Dan, Ex-General Secretary WJDSA wa kiwi kiwi.

Hei sakhi ya kani ka yakop da chem wa I yaleh man iwa yathain wei yabiangbor bha khlem em wa ioh u thap kol kat hadooh wa ki nongpynlai da hap ki wow chim ka rai lyngba ka yachut penelty heiwa ha kani ka yachut ka Sabah Muswang Sports Club da tam ko ya ka FAM da 2 kol wei da pynsabut leh wow man ka Champion iong kani ka Tournament sa ha uni u snem 2024.

Yei nam Man of the Match iong kani ka Tournament darah da u Wohjrem Shylla na ka Sabahmuswang SC, yei nam Best Goal Keeper darah da u Benedict War iong ka FAM, yei nam Top Scorer darah da u Deiwaemitre Shylla iong ka Sabahmuswang SC uwa daioh u thap hadooh 10 tylli ki kol katwa yei nam Player of the Tournament darah da u Dachanmitre Dkhar iong ka FAM.

Ya ka Champion Team iong kani ka Tournament nalor ki Medal, Certificate wa ka Trophy da e leh ya ka song poisa wa 20 hajar tyngka katwa ya ka Runner-up wan nalor ki Medal, Certificate wa ka Trophy da e leh ya ka song poisa wa 10 hajar tyngka.