Rah ka 7 Wasa Utd iaka nam lahduh 14th U Kiang Nangbah Memorial Trophy ka WJDSA

Syllad | The Rising MeghalayaOctober 8, 2022

Ka 7 Wasa Utd kala rah iaka nam lahduh U Kiang Nangbah Memorial Trophy kaba 14 ne ka Super Division Football Tournament mynta ka aiom ialehkai kaba pyniaid da ka West Jaintia District Sports Association hadien ba kala pynliem da 2-0 iaka Ladthadlaboh haka final kaba long ha Kiang Nangbah Stadium haka sngi Saitjain.

Ia kine ki ar kol la thep da u Buromlangki Salahe marwei (32’ bad 90’) kaba la biang pura ia u ban ioh khur iaka khusnam Man of The Match.

Kane ka jingiohrah nam lahduh ka 7 Wasa ka dei ka sien kaba san bad kane ka kynti, katta ka nam lahduh kaba nyngkong kala khur ha u snem 2016, 2017, 2018, 2021, 2022. Ka 7 Wasa kala long teng ruh ka lahduh jong ka Meghalaya State League.

U kongsan ba wan sakhi ia kane ka final u dei u Ma Sniawbhalang Dhar myntri ka tnad Transport bad kiwei kiwei ka sorkar jylla. La iadonlang u nominated MDC Octomewot Lamin, President East Jaintia District Football Association James Sutnga, u Additional Deputy Commissioner, West Jaintia Hills u PK Boro, DSO West Jaintia Hills Ma Khroobok Passah, ki nongialam bad dkhot ka WJDSA ba kynthup ia u Working President EMH Passah, General Secretary ma Lammat OO Laloo bad kiwei kiwei.

Ka 7 Wasa ha kane ka jingiakhun kala ialehkai da ka sur ialehkai kaba itynnad kaba la pynshongshit ia u nongpeit kai naduh kaba sdang jong ka jingiakhun. Kala nion iaka kut ialehkai ka Ladthalaboh bad la don ki khep kiba ki player ka Ladthalaboh I kum ba kin lut lyer noh syndon ha ki minit ialehkai shuwa ban wai ka por.

Ka Ladthadlaboh ha kane ka jingiakhun kam shym la lah ban ialehkai bha bad kam shym la lah ruh ban pynkylla sha ki kol iaki katto katne ki kabu ksiar ba kala ioh.

Mynta ka sngi ka 7 Wasa kala pynthikna hakhmat u paidbah ba wan sakhi ba ka dei ka Champion ne lahduh lada long kumno kumno ruh bad ka dei hok ruh ban ioh ia kane ka nam ha Jowai.

Ka khusnam Top Scorer la ioh rah da u Pynishai Lathong jong ka Nangbah Mulang, ka Best Goalkeeper da u Sbing Chyrmang jong ka Ladthadlaboh bad ka nam Player of the tournament da u Sanjini Dkhar jong ka 7 Wasa Utd.

Ka 7 Wasa kum ka lahduh kala rah iaka song pisa T. 60 hajar bad ka trophy, katba ka Ladthadlaboh kala ioh rah ka song pisa T.35 hajar.