Rah ka Ace Merakis ka Shillong Commerce College iaka ‘College Ke Tashanbaaz’ ka Red FM

Syllad | The Rising MeghalayaSeptember 17, 2024

Kawei na ki rynsan it iaka sap ne ka ‘talent hunts’ kiba heh tam ha ka ri India ka “College Ke Tashanbaaz,” ka la wan ha Shillong, ha kaba la wanrah lang ïa ki sap ba phriang tam na ki college jong ka sor Shillong kaba kynthup haduh 33 tylli ki sor bad kaba la long ha palat 300 tylli ki skulbah, ha kaba la ai lad ïa ki khynnah ban pyni ïa ki sap jong ki ha ki bynta bapher bapher kum ka rwai, ka shad, ka stand-up comedy, bad ka jingpyni ïa ka ktien.

Ka Grand Finale jong ka College Ke Tashanbaaz kaba la pyniaid da ka Red FM ka la kut noh ha ka 14 tarik Nailur 2024 ha Seng Khasi College, ha kaba ka Ace Merakis, ka kynhun shad na Shillong Commerce College, kila jop iaka khusnam Tashanbaaz 2024.

Ha kane ka jingïapyni sap kaba la ïaid lyngba 10 tylli ki skulbah ha Shillong, la jied ïa ar ngut ki nongjop na manla ka skul ban ïashim bynta ha kane ka jingïakob ba pawnam, ha kaba la ïoh pyni ïa ki sap ba pher bapher.

Ka Ace Merakis ka la pynshong shit ïa ki nongbishar bad ki paidbah, ha kaba ki la ïoh rah ïa ka song pisa kaba T.11,000. U First Colour Lathong, uba dei u nongrwai na St. Anthony’s College, u la ïoh ïa ka Boom Boom Boomer Special Prize, kaba la pynkhlaiñ shuh shuh ïa kane ka sngi ba don jingmut.

Kane ka jingïalang ka la long kaba shongkun da ka jingïadon lang u nongrwai ba pawnam u Shri Aiborlang Marbaniang, u nongshon-guitar bad uba dei u dkhot jong ki kynhun rwai ba paw ha Shillong kum ka Still Status, Awakening bad Fireflood, ryngkat bad ka   Marwein, kaba dei ka nongrwai songwriter ba pawnam bad ka Lecturer jong ka economics, kiba la long kum ki nongbishar ha kane ka jingïalehkai. Ka jingtip bad ka jingai jingmut jong ki ka la nang pynheh bad pynbha shuh shuh ïa kane ka jingïakob.

La plie ïa ka prokram da ka jingkren na u Bah WB Rynjah, Principal jong ka Seng Khasi College. Ka Station Head jong ka Red FM, ka Jacqueline Thangkhiew, ka la ai ruh ka jingkren kaba khyndiat ban pynpaw ïa ka jingsarong halor ki sap kiba la pyni bad ïa ka jingjop jong kane ka jingïalang.

Nalor ka jingpynbyrngia ka prokram ka kynthup ruh ïa ka jingai jingtip lyngkot halor ka HIV/AIDS da ka Meghalaya AIDS Control Society (MACS) Shillong. 

Da kane ka College Ke Tashanbaaz, ka Red FM ka la ai shuh shuh ïa ka lad kaba khraw ban pyni ïa ki sap jong ki samla Shillong, kaba pynneh ïa ka nam jong kane ka sor kum ka jaka ba khraw ha ka jingpynpaw sap bad jinglah jong ki samla.