Rah ka Bahun Nongrum yaka Miss Narwan Orange Festival

Syllad | The Rising MeghalayaFebruary 3, 2024

Ka Narwan Multipurpose Co-operative Society Ltd, East Jaintia Hills ha ka thong wow pynbna pyrthai yei nam i pyrtuid ka chnong Narwan kam kawi na ki chnong wamih bha u soh Khontara, ha ka 30 wa ka 31 tarik Duiatra da pynman ko ya ka 1st Orange Festival heiwa dawan wai pyrda ya ka da u Paul Lyngdoh, Minister ka Sorkar watoh u peit ya ka Art & Culture deilang ya ka Tourism Department katwa ka Santa Mary Shylla, MLA Sutnga-Saipung daman ko kam ka symbood kongsan nalor i emlang ki heh sorkar wa ki waheh chnong.

Ha ka yalang yahkhmat iong i wai ya kani ka Festival hei pynlai u Early Chyrmang da ioh ki kyntien pdiang burom na u Lamsuk Langstang, waheh Chnong Narwan neitae  i khana yei parom chaphang i rep Sohkhontara ha chnong Narwan iwa da man da ki 500 snem nachwa wada klam da ka Rose Merry Shadap katwa hei pynkut wa u Leo Shadap, secretary Chnong da e u ki kyntien khublei.

Ha ka sngi wa ar iong kani ka 1st Orange Festival da wan sakhilang da u Comingone Ymbon, Minister i/c Cooperation Department, Civil Defence & Home Guard etc kam u kongsan hei emlang ka S Rani, District Horticulture Officer, West Jaintia Hills District wa kiwi kiwa chah khutsniawbha. 

Ha waroh ar sngi iong kani ka Festival da em chiboon ki prokram pynwyrngia pynka-it ya kiwa wan sakhilang najan najngai kiwa kynthup ya ki Chad ki rwai, Cycle race, Trekking, Marathon, Awareness Programme ha ka phang “Effect & disadvantage of early marriage” wa ka “HIV/AIDS & Drugs”

Kyrpang chooh chooh leh hei janmiet iong ka sngi pynkut ya kani ka Festival da em ka yakop miat kynthai watip kam ka 1st Miss Narwan Orange Festival kawa da pynlai da u Goldenstar Suchiang wa u Early Chyrmang wei ya kani ka prokram da wan sakhilang leh da u Kyrmen Shylla, Minsiter ka Sorkar Meghalaya wei da pynchoh pynchongcit ya kani ka janmiet da ki put ki tem wa i rwai i siaw wad a chimbynta da Ki Mama Tips & Mama Bois, Dj Sethan wa kiwi kiwi.

Yei nam iong kani ka yakop miat kynthai nae 1st Miss Narwan Orange Festival 2024 da rah da ka Khyllood Bahun Nongrum, boodryngkhi wan ka Hakani Phawa wa ka Fisrtlin Roy Kam nalor kini da em leh i e yei nam 5 Subtitle wa kynthup ya ka Miss Ramp Walk wa daioh da ka Hakani Phawa, Miss Beautiful Hair da ioh da ka Ibashisha Pale, Miss Glowing Skin da ioh da ka Khyllood Lovely Tariang, Miss Perfect Ten da ioh da ka Ridashisha Pakem wa ka Miss Congeniality wan da rah da ka Khyllod Shidalin Shullet.

Neiliang ki bor pait bor pynlai ka 1st Narwan Orange Festival 2024 wa kynthup iow Advisor ma Chiborlang Wahlang, Director Narwan Orange Festival ka Sookini Sutnga kawa juh jop haka Miss Tourism Queen World Wide East India 2018, Miss Hynniewtrep 2018, Miss Royale India International 2022, wa ka Miss Cherry Blosom 2017 e ki i sniawngooh wakhroo ya ki khynnah skur wa kiwi kiwi kiwa da em bynta hei wow pynman ya kani ka Festival kawa jop wei lai beit lai ryntih.