Rah ka Christ Church Morning School ia ka nam lahduh ha ka ‘Inter School Football’  ka FKJGP Mawlai

Syllad | The Rising MeghalayaSeptember 16, 2023

Ka Christ Church Morning School, Mawlai Syllaikariah ka la lah ban pynliem ia ka Umrynjah Presebyterian Secondary School, Umrynjah da 2-0 ha ka jingiakhun ia ka final ban iohrah ia ka nam lahduh jong ka lympung ialehkai phutbol kaba la tip kum ka “IX Inter School Knock Out Football Tournament 2023” ne ka Inter school kaba khyndai ba la pyniaid da ka Federation of Khasi Jaintia and Garo People (FKJGP), Mawlai Circle ha madanheh mini stadium ha ka sngi Thohdieng ka 15 tarik mynta u bnai Nailur, 2023.

Ia kitei ki ar kol la thep da u Precious Muktieh ha ka kyllamiet hadien ba ym shym la don kiba la lah ban ia thep kol ha ka jingiakhun ha ka kyllastep. Kane ka dei ka sien kaba nyngkong ia ka Christ Church Morning School bakan iohrah ia kane ka Inter Skul jong ka FKJGP, Mawlai.

Ha kane ka sngi la sam ruh ia ki khusnam shimet sha ki nongialehkai, ha kaba ia ka nam Promising Player la ioh khur da u Medonryngkat Kharumnuid (Mayqueen SS), ka nam Top Scorer (nongthep kol buntam) ka la leit sha u Kitborlang L. Marshillong ka Christ Church Morning School, ka nam Best Golakeeper (nongap kol ba tbit tam) ka la leit sha u Damanbha Warjri, ka Umrynjah Presbyterian, ka nam rangkynsai ne Best Player ka la leit biang sha u Kitborlang bad ia ka nam Best Dicipline Team la ioh khur da ka Mayqueen Secondary School.

Ia ka jingiakhun ia ka final ha kane ka sngi la wan sakhi lang u bah Eldie N. Lyngdoh, General Secretary ka FKJGP, Sengkmie kum u Kongsan, u Kitborlang Nongphlang, vice president ka FKJGP, Sengkmie kum u symbud kongsan, ha ka jingdon ryngkat u bah Tamdor Nadon kum u ba shah khot sngewbha, u bah Khrawkupar Nongsiej, president FKJGP, Mawlai Circle, bah Johny Khongsit, bah Shanbor Rapsang, bah Dunli Majaw, kiba la sam ia ki khusnam bad ki medal, ki nonghikai jong ki skul bapher bapher, ki khynnah skul bad kiwei kiwei.

Ha kane ka Inter Skul kaba mynta u snem ki la don baroh 15 tylli ki skul kiba la poi ban ia shim bynta. Ka phang pdeng kaba ka FKJGP Mawlai Circle ka la ai mynta u snem na ka bynta kane ka lympung ialehkai phutbol ka dei, “Say no to Drugs, say Yes to Football” ne “Ong em ia u Drug, Hooid ia ka Football,” bad ka dei ka phutbol kaba ki ju pynlong manla u snem. 

Ha kane ka sngi la ioh ia ka jingkren na u kongsah u bah Eldie uba la pynpaw ba ki nongwei ki la wan ban pynjot ia ka ri baieit ban khaii ia ki drok kiba la pynjot ia kiba bun ki khun samla ka ri.Kumta u la kyntu ia ki khynnah skul bad kumjuh ia baroh ki khun samla ba kin kiar ia u drok, naba kino kino ki samla kiba la ngop ha une u jait jingdih ki shah peit bymdei bad ki shah kyntait ha ka imlang sahlang.

Ha kane ka sngi la ioh ruh ia ka jingkren na u symbud kongsan u bah Kitborlang uba la pynpaw ba bun hi kiba khaii drok kiba shah kem ki dei ki bar jylla, kiba pyni ba kine ki leh thma jar jar ia ka jaitbynriew lyngba une u jingdih basniew.