Rah ka Dubakh bad Monarch ia ka nam lahduh haka ‘4th Berchem Cup’

Syllad | The Rising MeghalayaApril 30, 2024

Ka kynhun Dubakh bad ka Monarch ka la ioh rah nam lahduh ha ka liang ki kynthei bad ha ka liang ki shynrang jong ka lympung ialehkai basketball- 4th Berchem Cup kaba pyniaid da ka Seng Samla Nongpoh Proper kaba la poi noh sha kaba kut haka 27 tarik Iaiong.

La wan ban pynhap pyrda ia ka 4th Berchem Cup  da ki nongialam Sengbhalang ka them Ri Bhoi District ba kynthup ia u Bah Ferdynald K Kharkamni, President ka KSU North Khasi Hills District kum u kongsan ha ka jingiadonlang u Bah Markus Marten, President ka HNYF Northern Region, u Bah Luistar Lyngdoh, president ka FKJGP North Khasi Hills District kum ki symbud kongsan, u Bah Plielad Tiewsoh, President ka Ri Bhoi Tourism, u samla Anthony Suchiang, Secretary ka Dorbar Shnong Nongpoh, ki nongialalm ka Seng Samla Nongpoh Proper ba kynthup ia samla Lumlang Shylla, President bad u samla Ronald Rani general secretary nalor kiwei kiwei ki riew pawkhmat ka dong ka thain.

Haba kren ban ai jingiaroh bad ai mynsiem ia ka Seng Samla Nongpoh Proper, ki nongialam Sengbhalang ki la pynpaw ba ka jingnang treishitom bad ka jingaiti met bad mynsiem da ki nongialam ban nang pynbit pynbiang ia kane ka lympung ialehkai basketball ba la jer kyrteng kum ka Berchem Cup kaba la nang iai bna nam na kawei ka snem sha kawei pat.

“Ha Ri Bhoi District ngi la sakhi shibun ki lympung ialehkai sport kum ka football, cricket bad kiwei kiwei hynrei kane ka lympung ialehkai basketball Berchem Cup ka long shisha kaba la khring ia ki samla kiba donsap namar ka jingnang kiew ki kynhun na kylleng ki District ka jylla kiba la wan ban ia shim bynta ha kane ka tournament kaba long shisha kaba ai mynsiem ia ki nong pyniaid khamtam ka sport ka dei kawei na ki rynsan ban iada ia ki samla na ka jing shah pynngop ha ki jing sniew bapher bapher khamtam na ka jing kyrni ia u jingdih ba shyrkhei kata u drug “, ong ki nongialam.

Haba phai sha ka jingiakhun ia ka phainal jong ka 4th Berchem Cup, la sakhi ia ki jingiakhun kiba la pynshongshit bad pynbyrngia ia ki paidbah nongpeitkai ha kaba na ka liang ki kynthei ka Dubakh hadien ka jingiakhun kaba tyngeh bha ka la lah ban pynliem noh ia ka kynhun SYM da 67 la 50 basket katba ha ka liang ki shynrang pat ka Monarch ka la pynliem noh ia ka kynhun jong ka Nongpoh da 100 la 64 Basket.

Ha kane ka sngi la sam ruh da ka khusnam da ka song pisa bad trophy ha kaba ka kynhun lahduh jong ki shynrang ka Monarch ka la ioh khung ia ka song pisa kaba long 70 hajar lem ka trophy, katba la Nongpoh ka la ioh khung ia ka song ba 40 hajar lem bad ka trophy ha ka liang ki kynthei pat ka kynhun Dubakh ka la ioh khung 40 hajar lem bad ka trophy bad ka SYM ka la ioh 20 hajar lem bad ka trophy, la sam ruh ia ki khusnam shimet bapher bapher.