Rah ka East Khasi Hills iaka nam lahduh ka Meghalaya Games kaba hynriew ha Jowai, wan pynhap pyrda u Dy CM
Ia ka lympung Meghalaya Games la pynkut noh ha ka 25 tarik Kyllalyngkot ha ka jingialang kaba iphuh iphieng ba la pynlong ha Kiang Nangbah Football Stadium, Jowai.
Ha kane ka lympung ialehkai kaba la neh shitaiew kynthih la sakhi ia ka jingwan iashim bynta jong ki palat 3500 ngut ki nongialehkai kiba la iashim bynta ha ki 29 tylli ki jait jingialehkai bapher bapher.
Ka East Khasi Hills District ka la ioh ia ka nam lahduh da kaba khur haduh 149 tylli ki takma ksiar, 105 ki takma rupsa bad 127 tylli ki takma rnong. Katba ka West Jaintia Hills ka la wan ha ka kyrdan kaba ar da kaba ioh ban khur 108 ki takma bud sa ka Ri Bhoi da 104 tylli ki takma.
Ha kane ka sngi la ia don lang ruh u Symbud Myntri Rangbah ka Jylla u Bah Sniawbhalang Dhar kum u Kongsan kynthup ia u MLA ka Jowai u Bah Wailadmiki Shylla, Working President ka Meghalaya State Olympic Association (MSOA) u Bah John F Kharshiing, Deputy Commissioner ka West Jaintia Hills uDistrict u Bah BS Sohliya, ki heh ophisar nalor kiwei kiwei.
Ha ka jingkren kum u Kongsan u Bah Sniawbhalang u la pyrto ia baroh kiba ia don bynta lang ban pynlong ia kane ka Meghalaya Games kaba jop, kata khamtam ia ka jingshimkhia jong u Myntri Rangbah ka Jylla u Conrad K Sangma, u MLA ka Jowai u Bah Wailadmiki Shylla, u Myntri ka Tnad Sports, ki Synjuk ialehkai bad kiwei kiwei.
“Ngi sngew sarong ban ong ba ngi la kotbor ruh ban khot pynlong syndon ia ka lympung National Games, ka Tnad Sports ka la sakhi ia ka jingkiew shaphrang hapoh jong ka sorkar MDA lyngba ka jingkyntiew ia ka mang tyngka bad ka jingshna ia ki jingtei na ka bynta ki kam ialehkai sport,” ula bynrap.
U la ong ruh, “Ka jingtei ia ka Mawkhanu football stadium ka ban dei kaba heh tam ha India kan pynlong ia ka Meghalaya ka nongbah jong ki kam ialehkai football ne ka ‘Soccer Capital’ hapoh ka ri India. U la kdew da kaba ong ba ia ka Meghalaya Games ka ban wan ym pat lah ban thikna namar ka Jylla ka la pynkhreh syndon ia ka National Games ka ban long ha u 2027.



Ha kane ka lympung la sakhi ruh ia ka jingwan iashim bynta jong ki hynniew ngut ki nongiashim bynta kiba don jingduna ha ki dkhot met (para-athletes) kaba pyni ia ka jingkotbor bad ka jingkdup lang ia baroh.

Leave a Reply