Rah ka khyllood Hakani Phawa yei nam Miss Lukha Festival 2024

Syllad | The Rising MeghalayaFebruary 9, 2024

Ka Sonapyrdi Tourism and Economic Development Society ha kani ka tayaw da pynman ko ya ka 4^th Lukha Festival 2024 ha ki ar sngi iong ka 2tarik wa ka 3 tarik Thohlakhmi heiwa u Charles Marngar, MLA-MDC ka Mawhati Constituency dawan u wow wai pyrda ya kani ka Festival hei sakhilang u Lasky Rymbai, Deputy CEM, JHADC kam u symbood kongsan nalor kiwi kiwa cha khut sniawbha.

U Charles Marngar hei klam iong-o, da yaroh u yei miat ioosuk I man I long ki talawiar ka Bei Rymaw khamtam I em ka Wah Lukha kam kawi na ki wah wa bna nam ka Ri Jaintia, kawa emkam u ioh I yada wei pynmiat pynioosuk yei man I long iongka khnang iow ye chooh ko u khrin ya ki waboon walang najan jngai.  

Neiliang u Lasky Rymbai hawa e kyntien kam u symbood kongsan da ong wa ka chnong Sonapyrdi man sakhiat ka chnong wa embhah wow ioh kam kani ka thaw wei da kyrsu kyntu u leh ya ki yahkhmat ka Sonapyrdi Tourism and Economic Development Society wow man kiwa peitsiar wei ymtoh u e lad ki wa kiwi ki ki bor u pyntngit nae u pynsihdur ki yei man ka Wah Lukha.

Kiwi de ki waheh wasian ka thain Narpuh kiwa da e I klam I kappe ha kani ka sngi toh u G.Dkhar na Lumshnong, U Francis Lamin na Umkiang, u Devender Bansal na Star Cement, u A.Pachiang, Rangbah chnong Mollamylliang, u D.Lamare, Secretary Shnong Sonapyrdi, wa u E.Lamare, Waheh Chnong Sonapyrdi.

Ha ki ar sngi iong kani ka Lukha Festival da em chiboon ki prokram wa kynthup ya I lai kjat nae Treking cha ki bynta u Loom Bahboo Bahkong iwa da man hei yahkhmat ki bru ka Wildlife Department, ki chad ki rwai sur tre wa da chimbynta da ki manbei, ki khynnah wa ki khon khynroo khyllood kam wow pynkmen pynka-it pynwyrngia yei man I sniaw iong ki lok ki jor wa wan sakhi. Ka yakop dro dur nae Drawing-Painting Competition.

Ha ka sngi pynkut iong kani ka Festival da wan sakhilang da u Emlangki Lamare, MDC Narpuh Constituency kam u kongsan wa u D.Malang kam u symbood kongsan wei ha ka yalang wa pynlai da u T.Gympad nalor ki kyntien iong u kongsan wa u symbood kongsan da ioh leh I klam e mynsien ya ka sein na u S.Suchiang na Lummyrli, u J.Dkhar na Lad umstain, wa u K.S.Suchiang, President  STEDS.

Iwa kyrpang chooh chooh ha kani ka 4^th Lukha Festival toh I pynman ya ka Yakop Miat Kynthai wa tip kam ka Miss Lukha 2024 wei yei nam kani ka yakop daioh u rah da ka Khyllood Hakani Phawa neitae boodryngkhi wan ka Ephida Ymbon wa ka Dorachiva Daw.

Chooh yei nam Miss Perfect iong kani ka yakp darah da Emika Dkhar, Beautiful Skin daioh da ka Sehema S.Sangma, Miss Congeniality daioh da ka Mariane Nongbri, Miss Cat Walk darah da ka Dorachiva Daw, Best Personality daioh da ka Niha Hajong wa yei nam Beautiful Hair darah da ka Ephida Ymbon.