Rah ka Krem Myrsiang iaka nam lahduh haka Second Div ka Saipung Block Sports Association

Syllad | The Rising MeghalayaDecember 12, 2023

Ka Krem Myrsiang FC kala jop da ka 1-0 iaka Ever Young haka jingiakhun final Second Division Football Tournament kaba pyniaid da ka Saipung Block Sports Association (SBSA) long ha madan Lamyrsiang haka 11 tarik Nohprah.

Ia kane ka shikol la thep da u Josly Chyrmang haka Extra-time kata haka minit kaba 115 kaba la biang pura iaka Krem Myrsiang ban rah syndon iaka nam lahduh mynta ka aiom ialehkai.

Da kane ka namjop ka Krem Myrsiang kala rah iaka song pisa Shiphew hajar tyngka bad ka Ever Young Hynniew hajar tyngka ryngkat ka trophy.

U kongsan ha ha kane ka final u dei u Ma Aron Bamon uwei na ki riew pawkhmat ka thain haka jingdonlang u President ka SBSA u Ma Victor Suja, u Ma Rimi Shadap General Secretary bad kiwei kiwei ki dkhot ka SBSA.

Ka khusnam ‘Player of the match’ la iohrah da u Nikison Chyrmang, ka khusnam ‘Best Goalkeeper’ la ioh rahda u Akash Lamurong baroh ar ngut kidei na ka kynhun Krem Myrsiang bad khusnam ‘Player of the tournament’ la iohrah da u Damehitre War na ka Ever Young FC.