Rah ka Ladthadlaboh SC ïaka Chatister Kharkongor Memorial Trophy

Syllad | The Rising MeghalayaNovember 4, 2019

JOWAI: Ka Ladthadlaboh SC kala ïoh ban rah ïaka nam lahduh hadien ba kala pynliem da 1-0 kol ïaka Sohmynting SC haka jingïakhun final jong ka 1st Division Football Tournament kaba la tip kum ka ‘9th Chatister Kharkongor Memorial Trophy’ kaba pynïaid da ka West Jaiñtia District Sports Association (WJDSA) kaba long ha Kiang Nangbah Stadium haka sngi Nyngkong.

Ïa kane ka shikol kaba dei ka kol jop jong ka Ladthadlaboh la thep da u Simeon Suchiang (64).

Ka jingïakhun hapdeng kine ki kynhun arliang mamla kalong kaba ïakhaid bha ha kaba kila lah ban ïalehkai da ka sur ïalehkai kaba itynnad kaba la pynshongshit ïa u paidbah ba wan sakhi.

Baroh ar tylli ki kynhun kila ïa ioh mar katjuh ka kabu ksiar, hynrei kaba bok ka nusip kaba la noh sha ka Ladthadlaboh kala ïoh ban thep ïa katei ka shikol lyngba u Simeon Suchiang uba la pynbuh bha dalade ha kaba u nongap kol ka Sohmynting um shym la lah satia ban teh lakam ïaka bol ha kaba kala lait na ka kti jong u bad u Simeon ula thep suk ïa kane ka kol.

U Simeon Suchiang ula ïoh khur ïaka nam Top Scorer hadien ba ula khyrwit 11 kol ha kane ka aiom ïalehkai, ka nam Best Goalkeeper kala leit sha u Loving Kindness Kyndait, u nongap kol ka Sohmynting, Man Of The Match Raymond Lyngdoh jong ka Ladthadlaboh, Player Of the Tournament u Heiplanmi Kassar jong ka Sohmynting.

U Deputy Commissioner, West Jaiñtia Hills District uba long u President jong WJDSA u Ma Garod LSN Dykes ula long kum u kongsan, u Ma Khroobok Passah, DSO East Jaiñtia Hills bad u Incharge DSO West Jaiñtia Hills ula long kum u symbud kongsan haka jingïadonlang u Ma Finely Pariat u khun jong u (L) Chatister Kharkongor, u President MSOA u Bah John Kharshiiing bad kiwei kiwei ki nongialam bad dkhot jong ka MSOA nalor ki nongïalam ka WJDSA.