Rah ka Laitkor SC ia ka nam lahduh ha ka ‘Women’s Football League Tournament 2024’ ka SSA

Syllad | The Rising MeghalayaDecember 31, 2024

Ka kynhun ki thei ialehkai phutbol ka Laitkor SC ka la ioh ban rah ia ka nam lahduh ha ka lympung ialehkai ‘Women’s Football League Tournament 2024, ‘ jong ka Shillong Sports Association hadien ba ka la lah ban pynliem noh ia ka Pay for Right Football Academy da 2-0 ha ka jingialehkai final kaba la long ha ka 30 tarik Nohprah ha Madan SSA Stadium, First Ground ha Polo.

Ka jingialehkai ka la long kaba itynnnad bha hadien ba ka Laitkor ka la lah ban pynliem noh lyngba ki artylli ki kol ba la thep da ka Sanfida Nongrum bad ka Ribahunshisha Kharshiing ha ka minit kaba 38 bad 40.

Ka Laitkor SC ka la ioh khung ia ka song pisa kaba T. 50 hajar ha ryngkat ka trophy bad ka Pay for Right FA ka la ioh ia ka song pisa kaba T. 25 hajar ha ryngkat ka trophy.

Ha kane ka sngi la sam ruh ia ki khusnam shimet ha kaba ka Nisilia Majaw na ka Pay For Right FA ka la ioh khur ia ka nam Top Scorer ne nongthep kol ba bun tam, hadien ba ka la ioh ban thep haduh 23 kol baroh bad ka Ribahunshisha Kharshiing jong ka Laitkor ka la ioh khur ia ka nam Player of the match.

Ha kane ka sngi kut la ia don lang u bah Lambor Malngiang, MDC ka Nongkrem, ki nongialam ka Shillong Sports Association kata naduh u bah Dipshon Lyngdoh, bah SS Rapthap bad kiwei kiwei, kiba shim bynta ruh ha ka jingsam khusnam.