Rah ka Mayalang Ymbon iaka nam Miss Lukha

Syllad | The Rising MeghalayaFebruary 3, 2020

KHLIEHRIAT: Ka samla Mayalang Ymbon kaba na Shangpung, West Jaiñtia Hills kaba dang pule ïa ka B.Tech ha National Institute of Technology Meghalaya (NIT) kala ioh rah iaka nam bhabriew tam ha ka jingiakop bha briew kaba la tip kum ka ‘Miss Lukha’.

Kane ka jingiakop bha briew kala long haka miet sngi Saitjain kaba la pynlong da ka Sonapyrdi Tourism Economic Development Society (STEDS) haka tamasa ‘Lukha Festival 2020’ kaba long harud ka wah Lukha.

Ka samla Riya Suting kaba naka shnong Madanryting Lumjingsuk kaba dang pule ïa ka Education (Hons) ha St Mary’s College, Shillong kala wan ba ar ha kane ka jingiakop bhabriew bad ka samla Lasmiker Dkhar kaba n aka shnong Moolamanoh, East Jaiñtia Hills District kaba dang pule mynta ïa ka B.Sc (Hons)  Botany ha St Anthony’s College, Shillong kala wan ba lai.

Katba ka samla Kerlarity Kharkongngor ka la ïoh ïa ka nam kum ka Miss Talented bad ka samla Bibanylla Nongsiej kum ka Miss Beautiful Smile.

La pynbit pynbiang ïa kane ka jingiakop Miss Lukha 2020 ha Sonapyrdi da ka samla Sookini Sutnga ka samla kaba la iohrah iaka nam Miss Tourism Queen World Wide East India ha u snem 2018, Miss Cherry Blossom bad kiwei kiwei ki nam jop.

Ka Lukha Festival kaba la sdang haka 31 tarik Kyllalyngkot bad la pynkut  ïaka haka miet sngi Siatjain (1 tarik Rymphang) bad la wan ban pynhap pyrda  ïa kane ka tamasa da Chief Executive Member barim jong ka Jaiñtia Hills Autonomous District Council u Ma Andrew Shullai.

U Ma Andrew Shulai u la ai ka jingiaroh ia ka Sonapyrdi Tourism Economic Development Society ka dei kawei na ki Society kaba ju ïa treilang bad ka JHADC ruh na ka bynta ban pynbha pynmiat ïa kane ka um ha wah Lukha. U la pynshlur ia ki nongialam bad ki dkhot jong ka Society ba kin nang iaid shakhmat ban kyntiew ia ka kam jngohkai pyrthei ka ban wanrah ruh iaka roi ka par ha ka thain.

“Da ka jingpynlong ia kum kane ka tamasa kala nang khring iai briew ban wan jngoh ia kane ka wah Lukha bad ïa ka jingitynnad jong ka mariang ha kane ka thaiñ,”ong u ma Andrew.

U la pynpaw ka jingsngewkmen halor ka jingioh jingiarap na kiba bun kiba la ïa pyrkhat lang kumno ban pynim ban pynneh pynsah ïa kane ka wah khnang ba kan long biang kumba long ha ki por ba mynshwa ba kan ïoh ban khie im biang kane ka wah.

“Lyngba kane ka tamasa nga khmihlynti ba kan pynkhie im wat ïa ka mariang sawdong ruh kaba long kawei na ki lad ki lynti ban pynneh pynsah naduh ki lum ki wah, ki khlaw ki btap ba kin neh kin sah khnang ba ka mariang kan iaid ryngkat ryngkat bad ka roi ka par, ka ioh ka kot bad kumjuh ruh ba kan nang kiew ka kam jngohkai pyrthei ha ki snem ki ban wan bad lyngba ka jingïatreilang jong ki dkhot ka Society wat hapdeng shibun ki jingeh da ka jingiatylli. Nga khmihlynti ruh ba ha kawei ka sngi yn sa tip ïa kane ka tamasa kum kawei na ki ‘State Festival,” la ong shuh shuh u Ma Shullai.

U Principal jong ka Jaiñtia Eastern College, Khliehriat u Dr. Phervision Nongtdu haba kren ha kane ka sngi u la pynkynmaw ïa ka mynnor kaba la leit ha ki por ba ka wah Lukha ka dang dei kawei na ki jaka jong ki rawon.

U la ban jur ruh ïa ka khuid ka suba da kaba kyntu ïa ki paidbah baroh ba ki dei ban sumar khuid ïa ki lum ki wah kiba don sawdong ha ki thaiñ Narpuh.

Haba kren shaphang ka jingdonkam ka jingnang jingstad, u Dr Phervision Nongtdu, u la pynshlur ïa ki samla pule jong ka thaiñ ba kin shim ïa ki lad ki kabu ban pyntbit shuh shuh ïalade ha ki tnat pule bapher bapher khamtam kaba pule ïa ka kam jngohkai pyrthei kaba dei kawei na ki kharkhana kaba plie lad ban kamai jakpoh.

Kiba la ïa don lang ha kane ka sngi ki kynthup ruh u Ma Helping Phawa u President jong ka Mutong Tourism Promotion And Environment Protection Society, u Ma W.Kyndoh,u Waheh Shnong jong ka shnong Lumtongseng, u Ma W Syngkor u Waheh Shnong ka shnong Lummyrli,u bah WS Talang, u Waheh Shnong jong ka shnong Borsara bad kiwei kiwei.

Na ka liang u President ka STEDS U Ma Daiapherbha Lamare u la kyrpad ia u Ma Andrew Shullai Uba long ruh u opposition leader ka Jaintia Hills Autonomous District Council (JHADC)  ban Ia iakren lang bad ka District Council na ka bynta ba kin long trai ia ka Wah Lukha bad ban leh ruh shibun ki kam na ka bynta ban pynim bad pynneh pynsah ia ka Wah kaba long ruh kawei ka wah kaba heh tam hapoh Jylla khnang ba ba ki nongshong shnong kin ioh jingmyntoi na kane ka wah bad na ka kam jngoh kai pyrthei ha Sonapyrdi lyngba ka jingdon ka wah ba itynnad bad ki khlaw ki btap ki ba jyrngam.

Ha kane ka tamasa ka la don ruh ka Trekking ha kaba la wan ban ïashim bynta da shibun ki briew kiba ieid mariang ha kaba ki la iaid kylleng ka khlaw jong ka Narpuh Wildlife Sanctuary hapoh ka jingialam u Ma Shanbor Law, u Range Forest Officer ha ryngkat lang bad ki nongtrei jong ka tnat Wildlife.

Nalor kane ka trekking la don bun kiwei kiwei ki prokram pynbyrngia ha ki arsngi kaba la pynshongshit ia kane ka tamasa bad kala khring iaki hajar hajar ngut ki paidbah na kylleng.