Rah ka North Liberty HSS iaka overall champion haka Inter School Athletic Meet ha Jowai

Syllad | The Rising MeghalayaMay 3, 2024

Ka North Liberty Higher Secondary School (NLHSS) kala ioh khur iaka nam overall champion haka District Level Inter School Athletic Meet 2024 hadien ba kala ioh khur 14 tylli ki takma ksiar, 12 tylli ki takma rupa bad 4 tylli ki takma rnong kaba la poi noh sha kaba kut haka 3 tarik Jymmang ha Kiang Nangbah Stadium.

Ia kane ka inter school athletic meet la pyniaid da ka ophis u District Sports Officer, (DSO), West Jaintia Hills ryngkat ka jingiatreilang ka West Jaintia District Sports Association (WJDSA).

Ka North Liberty Higher Secondary School (NLHSS) nalor ba kala ioh khur 14 tylli ki takma ksiar, 12 tylli ki takma rupa bad 4 tylli ki takma rnong, kala ioh khur ruh iaka nam ‘Best Athlete’ haka kyrdan Under-14, 16 bad 18 naka liang ki kynthei.

Iaka nam ‘Best Athlete’ jong ka kyrdan Under-14 naka liang ki shynrang la ioh da ka Advantist HS School ba la mihkhmat da u Stephan Wakambam Daimary haka jingiakop Shotput. Katba naka liang ki kynthei la ioh da ka North Liberty HS School ba la mihkhmat da ka Iban-E-ti-lut Shylla haka jingiakop mareh kaba 60 metre

Haka kyrdan Under 16 naka liang ki shynrang la ioh da ka skul Govt. Boys HS School ba la mihkhmat da u Teilang-mi-I Phawa haka jingiakop mareh kaba 2000 meter. Katba na ka liang ki kynthei la ioh da ka skul North Liberty HS School ba la mihkhmat da ka Eladki Ksoo haka jingiakop mareh kaba 100 meter.

Haka kyrdan Under-18 naka liang ki shynrang la ioh da ka skul Govt. Boys HS School ba la mihkhmat da u Iohi-ksan Lyngdoh haka jingiakop mareh kaba 100 meter, katba na ka liang ki kynthei la ioh da ka North Liberty HS School na la mihkhmat da ka Deigratia Dan haka jingiakop mareh kaba 100 meter.

Iaka nam ‘Best Team’ jong haka kyrdan Under-14 naka liang ki shynrang bad kynthei la ioh da ka North Liberty HS School da kaba khur 5 tylli ki tkma ksiar bad 5 tylli ki takma rupa bad kawei ka takma rnong.

Haka kyrdan Under-16 naka liang ki shynrang la ioh da ka Govt. Boys HS School da kaba khur 5 tylli ki takma ksiar, 3 tylli ki takma rupa bad 2 tylli ki takma rnong. Katba na ka liang ki kynthei la ioh da ka North Liberty HS School da kaba khur 4 tylli ki takma ksiar, 5 tylli ki takma rupa bad kawei ka takma rnong.

Haka kyrdan Under-18 na ka liang ki shynrang la ioh da ka skul Government Boys HS School da kaba khur 2 tylli ki takma ksiar bad 5 ki takma rupa. Katba na ka liang ki kynthei la ioh da ka North Liberty HS School da kaba khur 5 tylli ki takma ksiar, 2 ki takma rupa bad 2 takma rnong.

U Deputy Commissioner ka West Jaintia u Bah BS Sohliya, IAS ula long kum ku kongsan haba pynkut ia kane ka athletic meet haka jingdonlang ka District School Education Officer (DSEO) Kong A Syiem, u District Sports Officer (DSO), West Jaintia Hills Bah Khroobok Passah, ka District Sports Officer (DSO), East Jaintia Hills Kong Stephanie M Rapsang, ki nongialam bad dkhot nongkitkam ka WJDSA, ki Principal, ki nonghikai nalor kiwei kiwei ki riew pawkhmat ka thain.