Rah ka Phudmuri ia ka phutbol rakhe dap 100 snem ka Mawlai Sports Club 

Syllad | The Rising MeghalayaFebruary 13, 2022

Ka kynhun ïakynjat bol jong ka Mawlai Phudmuri ka la ïohrah ïa ka phutbol rakhe dap 100 snem ka Mawlai Sports Club, hadien ba ka la pynliem ïa ka Mawlai Motsyiar da 6-0 kol ha ka final jong ka Memorail Inter Dong Football Tournament 2021-22 ha madanheh mini stadium, Phudmuri ha ka sngi Saitjaiñ.

La pynïalehkai ruh ïa katei ka phutbol ban pynsahkynmaw ïa ka kyrteng jong u bah John Mill Jala, IAS, (Retd), uba dei ruh u President barim ka MSC.

Ka Phudmuri ka la thep San kol ha ka kyllastep bad 1 kol ha ka kyllamiet.

Ïa ka kol kaba nyngkong la thep da u Bapyndap Kharshiing ha ka 8 minit, kaba ar la thep da u Banraplang Pynrope ha ka 11 minit, balai ka la wan lyngba u Sangki Shanglong ha ka 26 minit, ka kol basaw la thep biang u Bapyndap ha ka 29 minit, basan thep biang u Sangki ha ka 45 minit jong ka kyllstep, katba ka kol ba hynriew bad bakhatduh la thep da u Robert Khongriah ha ka 77 minit jong ka kyllamiet.

Ka nam top scorer ne nongthep kol bun tam ha kane ka lympung ïakhun, ka la leit sha u Robertson Khongriah jong ka Phudmuri, uba la thep 8 kol baroh, u Badon Kharlyngdoh ka Mawlai Mawdatbaki u la ïohrah ïa ka nam Best Goalkeeper bad u Nathaniel Kharbuli ka Phudmuri u la ïohrah ïa ka nam Promising player.

Ka kong Annabel War ka khun i bah (L) J.M Jala kum ka kongsan ha ha kane ka sngi ka la sam ïa ka trophy bad ka song pisa kaba 30, 000 tyngka sha ka Phudmuri kaba long ka Lahduh bad u Bah George Kharmujai u la sam ïa ka trophy bad ka song pisa ba 20,000 tyngka sha ka Motsyiar kaba la wan baar.

Ha kane ka sngi la sam ruh ïa ka Shap Sahkynmaw sha ki katto katne ngut kiba la don bynta bad ka MSC ha ka jingïaid lynti jong ka haduh banda dap 100 snem ka Sports Club.

Ha kane ka sngi la don lang ki rangbah shnong, u Bah S. Khongkliam jong ka Mawlai Phudmuri, bah Tyllilang Mylliem Umlong ka Mawlai Umthlong, bah MW Nongbri, rangbah shnong ka Motsyiar, bah Marcel Kharbani, president ka MSC bamynta bad kiwei kiwei.