Rah ka Seinjait Tuber HSS iaka overall champion haka ISAM ka DSO Khliehriat

Syllad | The Rising MeghalayaApril 28, 2024

Ka Seinjait Tuber Higher Secondary School, Tuber Kmaishnong kala rah iaka nam ‘Overall Champion’ haka jingialehkai District Level Inter Schools Athletic Meet 2024 kaba pyniaid da ka ophis District Sports Officer (DSO), East Jaintia Hills District ryngkat ka jingiatreilang East Jaintia District Sports Association (EJDSA).

Kane ka lympung kaba lai sngi kala kut noh haka 27 tarik Iaiong ha madan Teilang Phawa Dkhiah West bad la pynhap pyrda iaka da u Principal ka Jaintia Eastern Collage Dr. Phervision Nongtdu haka jingdonlang ka DSO Kong Stephanie M. Rapsang, ki nongialam bad dkhot EJHDA, ki riew Rangbah ka thain nalor kiwei kiwei.

Ha une u snem haduh 887 ngut ki khynnah skul shynrang bad kynthei naki 29 tylli ki skul jong ka District ki la shim bynta haki jait jingiakop bapher bapher ba la bynta naduh ka kyrdan Under-14, Under-16 bad Under-18.

Ka Seiñjait Tuber Higher Secondary School Tuber Kmaishnong ka la ioh rah iaka nam Overall Champion dei hadien ba ka la khur 8 tylli ki takma ksiar, 4 tylli ki takma rupa bad 4 tylli ki takma rnong bad ka la ioh khur ruh iaka nam Best Athlete jong ka kyrdan Under-16 Boys bala mihkhmat da u Ribait Bang bad nam Best Team.

Iaka nam Best Team jong ka kyrdan Under-14 jong ki shynrang la rah da ka K.B Memorial Secondary School kaba la khur 2 tylli ki takma ksiar, 2 tylli ki takma rupa bad artylli ki takma rnong. Katba naka liang ki kynthei la rah da ka Tluh Secondary School kaba la khur 2 tylli ki takma ksiar bad artylli ki takma rupa.

Iaka nam Best Team haka kyrdan Under-16 naka liang ki shynrang la rah da ka Sein Jait Tuber Higher Secondary School, Tuberkmai Shnong kaba la khur 3 tylli ki takma ksiar, kawei ka rupa bad kawei ka rnong. Katba na ka liang ki kynthei la rah da ka Sein Raij BR UP School, Mukhaialong kaba la khur 3 tylli ki takma ksiar, kawei ka takma rupa bad kawei ka rnong.

Ha ka kyrdan Under-18 iaka nam Best Team haka liang ki shynrang la rah da ka Sein Jait Tuber Higher Secondary School, Tuberkmai Shnong kaba la khur 3 tylli ki takma ksiar, kawei ka takma rupa bad kawei ka rnong. Katba na ki kynthei la rah da ka Sham Sham Secondary School kaba la khur 4 tylli ki takma ksiar, 2 tylli ki takma rupa bad 5 tylli ki takma rnong.

Iaka nam ‘Best Athlete’ haka kyrdan Under-14 naka liang ki shynrang la ioh da u Highbornson Muksor na Khliehriat Presbyterian H/S School da kaba khur 713 poin, katba na ka liang ki kynthei la ioh da ka Preamble Bareh na Sacred Heart H/S School, Lamyrsiang kaba la ioh 514 poin.

Ha ka kyrdan Under-16 Boys la ioh da u Ribait Bang na Sein Jait Tuber H/S School da kaba ioh 615 poin, katba na ka liang ki kynthei la ioh da ka Diwakapaia Dkhar na Wapung H/S School, Wapung da kaba ioh 572 poin.

Haka kyrdan Under-18 Boys la ioh da u Lastly Suchiang na Sutnga Presbyterian Higher Secondary School (683 poin), katba na ka liang ki kynthei la ioh da ka Samery Dkhar na Sham Sham Secondary School (503 poin).