Rah ka Shillong bad ka West Jaintia ia ka nam lahduh ha ka Meghalaya Youth League 2024

Syllad | The Rising MeghalayaOctober 11, 2024

Ka Shillong Sports Association (SSA) bad ka West Jaintia District Sports Association (WJDSA) ki la ioh ban rah ia ka nam lahduh ha ka lympung ialehkai final jong ka “Meghalaya Youth League 2024,” kata ha ka kyrdan U-16 bad U-14 kaba la long ha ka 11 tarik Risaw ha Madan SSA Stadium, Ist Ground, Polo, Shillong.

Ha kane ka jingialehkai ka WJDSA ka la lah ban pynliem noh ia ka Nongstoin District Sports Association da 2-0 ha ka jingialehkai kaba nyngkong, katba ka Shillong SA ka la pynliem noh ia ka Ri-Bhoi District Sports Association da 2-1ha ka jingialehkai kaba bud.

Ha kane ka sngi pynhap pyrda ia kane ka lympung ialehkai ba la khot pynlong da ka Meghalaya Football Association bad ba la ai jingkyrshan da ka Sorkar Jylla la ia don lang ruh u Myntri ka Tnad Sports ka Jylla u Bah Shakliar Warjri kum u Kongsan, u MDC ka Mawsynram u Bah Alvin K Sawkmie, u Working President ka Meghalaya State Olympic Association u Bah John F Kharshiing, ki ophisar Sorkar bad kiwei kiwei.

Ka Deputy Commissioner ka East Khasi Hills ka Kong RM Kurbah IAS ka la ia don lang kum ka Kongsan ha ka final jong ka U-14, nalor ki dkhot ba rangbah ka MFA ba la lamkhmat da u President u Bah Hamletson Dohling bad u General Secretary Bah Sunesh Syiem.

Ka jingiakhun ha ka kylla step ka la kut noh khlem da don ba ioh pynkhih jar, hadien ba u Shanmiki Myrchiang ka WJDSA u la ioh ban thep mar ia sdang ka kylla miet bad pynbud sa u Elvinson Lyngdoh. Na ka liang ka NDSA kam shym la lah satia ban pynphai wat hadien ka jingpyrshang borbah bad kut noh da ka jingshah rem kaba da 2-0.

Katba ha ka U-16 ha ka kylla step la iohi ba kan kut khlem da don ba ioh ban thep kol, hynrei ka Ri Bhoi ka la pynioh da ka penalty ia kaba la thep da u Menangpyndap Khongjee hashwa kaba kut jong ka kylla step.

Watla katta ka RBDSA ka la ioh ia ka lad ban pyniakhaid mar ia sdang ka kylla miet lyngba u Wanplielad Marbaniang hadien ka jingbakla jong u kol ka SSA. Hynrei, u Iminstar Mawlong u la ioh ban pynphai biang sha shi kol na ka bynta ka Shillong bad pynskhem syndon ia ka jingjop.

Baroh kine ki artylli ki lahduh ki la ioh ban khur ia ka khusnam da ka song pisa kaba T.2 lak, katba kiba la shah rem noh ki la ioh mar T.1 lak.

Haba kren ha ka jingialang pynhap pyrda, u Kongsan Bah Shakliar Warjri u la ai khublei ia ki spah ngut ki khynnah kiba la iashim bynta ha kane ka lympung ialehkai MYL na ki bynta bapher bapher ka Jylla namar ka jingtrei shitom ka jong ki, bad u ai khublei kyrpang ruh ia kiba haiing hasem ki paralok parajor bad ki coach.

“Ka Meghalaya Youth League ka iahap bha bad ka jingthmu jong ka sorkar jylla ban kyntiew ia ki samla ialehkai jong ngi bad kine ki jingpyrshang kin sei ia u soh na ka bynta ka jylla jong ngi hadien habud,”  ong u myntri.

Nalor kata u Bah Shakliar u  pyntip ruh sha ki paidbah ba ka MFA Turf kaba ha Third Ground kan ioh ia u Artificial Turf ba thymmai ha kine ki khyndiat bnai ban wan.

Ia kane ka lympung ialehkai MYL la plie paidbah ha ka shiteng jong u bnai Naitung ba la dep da u Myntri Rangbah ka  jylla u Conrad K Sangma. Ha katei ka por u la pynbna ba kane ka lympung kan wanrah ka jingkylla ha ki kam ialehkai bad kan don ka jingktah kaba khraw ha ki kam ialehkai phutbol ha ka Jylla  bad shabar kumjuh. 

Ki don baroh 18 tylli ki district association kiba la wan iashim bynta ha kane ka lympung U-14 bad 19 tylli ha ka lympung U-16.

Haka Under-14, u Shanmiki Myrchiang ka WJDSA ula ioh khur Player of the Final bad ka khusnam Player of the Tournament. U paralok jong u u Kaisarmi Dkhar iaka nam Top Scorer, katba u Best Goalkeeper ka SSA u dei u Edyson Marbaniang.

Haka Under-16, u Iminstar Mawlong ka SSA ula khur iaka khusnam Player of the Final bad u Iaiapkyrmen Kharkongor (Best Goalkeeper) bad u Menangpyndap Khongjee (Player of the Tournament). U Me-u-ba-ai Sumer ka RBSA ula khur iaka khusnam Top Scorer.