Rah ka Sohkha Government Higher Secondary School iaka iakop Quiz haka International Water Conclave

Syllad | The Rising MeghalayaFebruary 4, 2024

Ka ophis Deputy Commissioner, West Jaintia Hills District, Jowai ka la pynlong ïa ka District Level Quiz and Painting Competition haka 3 tarik u Rymphang 2024 ha Conference Hall, jong ka DC office, Jowai.

Ha ka jingïakob Quiz ki don hynriew tylli ki kynhun lehkai na ki skul bad college kiba lah wan ban ïashim bynta kine ki kynthup ïa ka Sohkha Government Higher Secondary School, Sohkha, Thomas Jones Synod College, Jowai, Kiang Nangbah Government College, Jowai bad artylli kiwei pat ki kynhun ki dei na ka Bharat Scouts and Guides.

Ha ka jingïakob dro dur pat ki don 28 ngut ki nongwan ïashim bynta.

Ki phang pdeng jong ka jingïakob dro dur ki kynthup halor, Ka jingtyngkai ïa ka um: Ka jingpyni lyngba ki jingdro halor ka jingtyngkai ïa ka um ba lah ban pynneh pynsah ïa ki tyllong um.

Ka jingïadei hapdeng ka jingim bad ka um: Ban tih janai halor ka jingïadei ba kongsan hapdeng ka um bad ka jingim, ka jingdon bynta ka um ha ka pyntha ki jingthaw, ka koit ka khiah bad ha baroh ki liang jong ka bha ka miat.

Ka jinglah ban tyngkai ha ka lawei: Ka jingïohi jngai halor ka jinglah ban tyngkai bad pynneh ïa ka um ha ka lawei lyngba ki jingpynshat jingmut ha ki jingdro dur, hapdeng ka jingbuh jingmut kyrpang ïa ki jingeh ba ki jaka ri lum ki mad ba ïadei bad ka jingduna bad kyrduh um.

Ki ar kynhun kiba la jop ha ka jingïakob leh Quiz ki kynthup ïa ka Sohkha Government Higher Secondary School, Sohkha ba la ïashim bynta da u Gorge Donkupar Gassah bad u Nangkhraw Kitbor Khonglah.

Kaba wan ha ka kyrdan ba-ar pat ka dei ka Thomas Jones Synod College, Jowai ba la ïashim bynta da u Mutbha Lapasam bad u Quikly Pala. 

Ka Kong B Blah, kaba long ka Adittional Deputy Commissioner, West Jaintia Hills District, Jowai ha ka jingaiktien sha baroh ki nongïashim bynta ka la ong ba kine ki program jong ka jingïakop kam dei satia tang na ka bynta ka jingrakhe ïa International Water Conclave 2024 hynrei ka dei ruh shibynta ka jingpynsaphriang jingtip ha kaba ïadei bad ki mat ba tyngkhuh bad ka um.

Kumjuh ruh ka lah ong ba īa ka jingïakob dro dur dang hap ban ap ban pynbna īa ki nongjop namar ka jingphah īa ki jingdro sha Shillong ban peitthuh da ki nongbishar.

Ki nongjop na kine ki jingïakob kin īohlad pat ban mihkhmat na ka district sha ka kyrdan īakob ha baroh kawei ka jylla.