Rah ki khynnah ka 7 Wasa iaka nam lahduh haka Independence Day Cup ka WJDSA

Syllad | The Rising MeghalayaAugust 15, 2024

Ka 7 Wasa United kala pynliem da ka tie breaker da 4-3 iaka Khimusniang haka Independence Day Cup Under-17 Football Tournament kaba pyniaid da West Jaintia District Sports Association (WJDSA) bad ka District Administration West Jaintia Hills.

Ia kane ka phainal la pynlong ha Kiang Nangbah Stadium haka 15 tarik Nailar ha kaba la wan ban sakhi da ki spah ngut ki nongkyrshan jong kine ki kynhun.

Haba phai sha ka jingialehkai, ka jingiakhun kalong kaba iathain bad kaba iadei bor bha. Hynrei kine ki kynhun arliang mamla haduh bala wai ka por iakhun kim  lah satia ban pynkylla sha ki kol iaki kabu ksiar kaba kila ioh.

Haduh bala rah iaka jingiakhun sha ka extra time ruh ym lah satia ban rai iaka nam jop namrem kine kine ki arliang mamla. Dei haka tie breaker, ka 7 Wasa kaba heh ka bok ka nusip kala pynkhih iaka jar 4 sien bad 3 na kaliang ka Khimusniang, kaba la biang pura iaka 7 wasa ban rah iaka nam lahduh bad ka  song pisa kaba T. 30 hajar bad ka Khimusniang T.20 hajar ryngkat ka Trophy bad syrnot.

Ka khusnam Man of the Match kala leit sha u Eny Manner, Best Goal Keeper- Richard Khaii, Top Scorer Riphi o Shylla uba la khyrwit 5 kol ha kane ka aiom bad ka nam Player of the Tournament la khur da u Dawansalanmi Malang.  Baroh kine ki saw ngut ki nongialehkai ki dei ki nongialehkai jong ka 7 Wasa.

U kongsan uba sam iaki khusnam u dei u Deputy Commissioner ka West Jaintia Hills District u Bah BS. Sohliya, IAS, ryngkat u Assistant Director ka tnad sport bad District Sports Officer ka West Jaintia Hills District u Bah Khroobok Passah, u Working President ka WJDSA u Bah EMH Passah, ki dkhot nongkitkam ka WJDSA bad kiwei kiwei.