Rah ki thei bad rang ialehkai ka Amlarem Block iaka CM Under-12 Football u DSO Jowai

Syllad | The Rising MeghalayaMay 9, 2023

Ki khynnah ïalehkai shynrang bad kynthei jong ka Amlarem Block ki la rah ïaka nam lahduh haka jingïakhun final jong ka lympung ïalehkai Chief Minister District Level Open Under-12 Football Tournament.

Kane ka la wan hadien ba ki khynnah ialehkai ka Amlarem Govt LP Skul bad ka Padu Utd kila jop haka jingiakhun final kaba long ha Kiang Nangbah Stadium, Ladthadlaboh Jowai haka sngi ba Ar.

Ïa kane ka lympung ïalehkai la pynïaid da ka ophis u District Sports Officer (DSO), West Jaintia Hills District ha baroh saw tylli ki block ha West Jaintia Hills kynthup ka Thadlaskeiñ Block, ka Laskeiñ Block, ka Amlarem Block bad Namdong Block. Kiba jop naka Block Level kila iakhun iaka semifinal haka sngi Nyngkong.

Haka jingïakhun final mynta ka sngi na kaliang  ki kynthei ka Amlarem Govt. LP School ka la pynliem ïaka Mukhla Grassroot Centre da 1-0 bad ïa kane ka kol la thep da ka Steffy Jungai (35) bad kane ka klo kala neh haduh bala wai ka por iakhun.

Katba na ka liang ki shynrang ka Padu United A ka la pynliem ïaka Ummulong Grassroot Centre da 1-0 lyngba ka kol ba la thep da u Hopeful Pohthmi (55). Kane ka jingiakhun katkum ka por bala buh kala wai da kaba iakhaid dei haba la rah sha ka jingiakhun extra time kane ka kol kala mih paw lyngba ka penalty.

Da kane ka namjop ki khynnah ialehkai ka Amlarem Block kin ioh ban mihkhmat ïaka District haka jingïakhun jong ka kyrdan State Level ka ban long haka 11 tarik Jylliew.

Ïa kane ka lympung la wan ban pynhap pyrda ïaka da u Working President ka West Jaintia District Sports Association (WJDSA) u EMH Passah, vice president WJDSA Patrick Lamare haka jingdonlang u District Sports Officer (DSO) u Khroobok Passah nalor kiwei kiwei.