Rah ki thei bad rang ka North Liberty Higher Secondary School iaka Under-17, ka HK Singh Memorial HSS iaka Under-14 haka Suborto Cup u DSO Jowai

Syllad | The Rising MeghalayaJuly 3, 2023

Ki thei bad rang ialehkai ka North Liberty Higher Secondary School, Jowai kila rah iaka nam lahduh haka Under-17, katba ka HK Sing Memorial Secondary School kala rah iaka Under-14 Boy’s haka District Level Subroto Mukherjee Cup kaba pyniaid da ka ophis u District Sports Officer, West Jaintia Hills District.

Kane kala wan hadien ba kine ki skul kila jop haka jingiakhun final kaba long haka sngi Nyngkong ha Kiang Nangbah Stadium.

Haka jingiakhun final ki kynthei, ka North Liberty Higher Secondary School kala pynliem da 2-0 iaka Kiang Nangbah Higher Secondary School. Ia kine ki ar kol la thep da ka Eilad Ksoo (30) bad ka Deigratia Dan (42).

Katba haka jingiakhun ki shynrang ka North Liberty Higher Secondary School kala jop da 3-0 iaka Government Boy’s Higher Secondary School. Ia kine ki lai kol la thep mar shikol da u Sahame Lyngdoh (4), Lovingstar Suting (48) bad Nickyboy Swer (50).

Ka HK Singh Memorial Secondary School kala pynliem da 1-0 iaka Lumpyrtuh Secondary School haka Under-14 Boy’s. Ia kane ka kol la thep da u Seibor Dkhar (49).

Ka jingiakhun phainal mynta ka sngi kala long kaba shongshit kaba la wan ban pyndap smam iaka madan da ki nongkyrshan jong kine ki skul wat hadpeng ka jingsniew ka mariang.

U kongsan uba wan sakhi ia kane ka lympung ki khynnah skul u dei u Additional Deputy Commissioner, West Jaintia Hills District u Mark Andrew Challam haka jingiadonlang u District Sports Officer u Khroobok Passah, u Working president ka West Jaintia District Sports Association u EMH. Passah, ki principal bad ki nonghikai bad kiwei kiwei.

Da kane ka jingjop, kine ki skul kin khreh ban mihkhmat iaka District haka State Level ia kaba yn sa pynlong ia ka mynta hi u bnai da ka tnad Directorate of Sports & Youth Affairs.