Rah ki thei ïalehkai ka Mawlai SC ïa ka nam lahduh ka Women’s Football ka Shillong SA

Syllad | The Rising MeghalayaMay 27, 2022

Ki thei ialehkai ka Mawlai Sports Club, ki la lah ha kaban pynliem noh ia ka Laitkor SC ha ka phainal ka lympung ialehkai Women Football League 2021-22, ia kaba la pynlong ia ka da ka Shillong Sports Association (SSA), ha MFA Turf Third Ground, Polo hynne ka sngi Thohdieng.

Haba phai sha kane ka jingiakhun, kam lah ban khlem da pynkyndit ia u paidbah uba bun balang ban shem bad iohi da la ki jong ki khmat ia katta ka rukom ialehkiai kaba tbit bad ba nylla bha jong ki samla kynthei na baroh artylli ki kyhnhun, kaba ka standart iakhun da shisha ka la kiew sted haduh katta katta.

Ka khana jong kane ka jingiakhun ka long ba ha baroh shi kynta tam jong ka por ba la buh, ki ar kynhun kim shym la lah satia ban ioh pynkhih ia ka jar, namar katta ka rukom ialehkai hapdeng ki thei jong ka Mawlai SC bad ka Laitkor SC, ka long kaba da itynnad ithiang bad iapbiej ban peit.

Katba nang iaid ki minit jong ka jingiakhun, la wan ban mihpaw ruh ki kabu ksiar kaba ki arliang ki la ioh, katno tam lei lei ia ka kynhun ki thei ialehkai ka Mawlai SC, kaba la don ki khep ba ka bol ba ki la khyrwit dain ka la dei beit ia ka dieng kol bad blait ka bol kan lait artad sharud, tad haduh ba kam da lah ban pynkynjik kynjak, ia u paid nongwan peitkai.

Ha kane ka jingialehkai, na ka liang ka Mawlai SC bad ka Laitkor SC, la don ruh ki thei ialehkai ba kyunsai bad ba da pnah bha ka rukom ialehkai ka jong ki, kaba man la ki khep haba kine ki thei ki ioh ban tehlakam ia ka bol ha ki kjat ki jong ki, da itynnad shisha bad shembad iohi ia ka jingnang ban pynbuh pat sha la ki paralok ba ialehkai lang.

Hadien bym shym la don ba lah ban pynkhih jar, ban ioh ia ka rai mano ban rah ia ka nam lahduh, la rah sha ka extra time, ha kaba ki thei ialehkai ka Mawlai SC ki la ioh syndet ban thep artylli ki kol ha kaba ka kol ba nyngkong la thep lyngba ka Ibashisha Khongwet ha ka minit kaba 65 bad ka kol kaba ar la thep pat da ka Bahunlang Synrem ha ka minit kaba 65+1, wat lada ki thei ka Mawlai ki la iw ia ka lyer jong ka nam jop, pynban ka kol lyngba ka  Ribahunshisha Kharshiing ha ka minit kaba 66 naka bynta ka Laitkor kam lah ban khlem da pynrah mynsiem ia ki, namar ba ka minit ban iakhun ka dang sah sa kumba kato katne por.

Ka jinglah ka Mawlai SC ban thep ia kitei ki artylli ki kol ka wan lyngba ka corner ha kaba baroh artylli ki kol ba la thep ki long kiba itynnad bad ka shi kol na ka liang ka Laitkor lyngba ka Ribahunshisha Kharshiing kaba la shut jam bha ia ka bol kham na jngai jong ka kol, ka pynkhih win hi puk ia ka mynsiem ki paid nongkyrshan ban ia risa bad kynhoi.

Da kumta ka jinglah ban pynkut noh ia kane ka lympung kan long pat ka jingplie ia ka lyn-nong kaba thymmai naka bynta ka lympung ialehkai Phutbol ki khynnah kynthei ia kane ka jylla, kaba lada baroh baroh ki shim khia lem kumba la leh da ka SSA, kumba long ki khynnah shynrang, lehse ki thei ialehkai ka jylla kin lah lem ban ia tbeh sha ka thong jong ka jingkiew ka Phutbol kynthei ha ka dong ka thain ne wat hakhmat ka ri hi baroh kawei.

Hadien ba la wai ka jingialehkai la sam ia ki medal, trophy bad ka song pisa da u working president u ban KS Kurbah, u Chairman Football Committee bah Robert Dkhar, u Hony Secy bah SS Rapthap, Women’s Football Secretary bah Freddy Kharpran.