Halor ka jingshah mait sdie ki nongialam shnong: Rah lama iong ki nongshong shnong ka Tuber Kmaishnong

Syllad | The Rising MeghalayaJanuary 10, 2024

Ka Dorbar Shnong Tuber Kmaishnong da ka jingsngewkhia halor iaka jingshah pynmynsaw ki nongialam shnong kynthup ia u Waheh Shnong u Micky Lyngdoh bad u Denis Lyngdoh Secretary IVCS uba long ruh u Chairman ka Shnong Tuber, haka 10 tarik Kyllalyngkot ki la pynlong ka jingiaid paidbah kaba jai jai ryngkat ka jingrah lama iong ban pynrem ia u Training Phawa uba donkti ban thombor ia kine ki nongialam shnong haduh ba kila mynsaw jur.

Ha kane ka jingiaid paidbah la shim bynta da ki spah ngut ki nongshong Shnong kynthup naduh ki nongialam Shnong, ki longkmie longkpa bad samla shynrang bad kynthei kiba la rah lang iaki lama iong ryngkat ki placard jingthoh pynrem ia u Training Phawa uba dei na kajuh hi ka Shnong Tuber Kmaishnong.

Katkum ki placard la thoh, “Ka Dorbar Shnong Tuber Kmai Shnong ka pynrem jur iaka jingleh riewkhlaw jong u Training Phawa uba kam ialade kum u dkhot ka sengbhalang Jaintia National Council Finance Secretary Central Body, uba thmu ban pyniap iaki arngut ki mynsiem briew”.

Shwa ka jingiaid paidbah, la pynlong iaka jingialang lyngkot ha madan Yurim Khliehpynthor ha kaba u Waheh Shnong u Micky Lyngdoh ula iathuh ia kaei kaba la jia iaki haka miet 3 tarik.

Nalor kata la ioh ruh ka jingkren lyngkot na u General Secretary Shnong Tellmetrue Phawa, Secretary VDP Molting Phawa bad na u Waheh Shnong barim u MB Sana.

Ka jingpynshai na u Training Phawa halor ka jingshah shoh ki nongialam shnong Tuber Kmaishnong

Baroh ki nongkren ki pynrem iaka jingleh jong u Training Phawa bad ha kajuh ka por ki kyntu ruh ia baroh ki nongshong shnong ban burom iaki nongialam shnong bad wanrah ruh iaka jingiatylli kawei hapoh ka shnong ka thaw. La kyntu ruh iaki kmie ki kpa ban aijinghikai iaki khun ki kti khnang ba kin nang ban burom ia kiba la san la rangbah khnang ban bha ka imlang sahlang.

Hadien ka jingialang lyngkot, ki nongshong Shnong ki mih na madan Yurim Khiehpynthor ban iaid paidbah ha kylleng ka Shnong ryngkat ka jingpyrta pynrem bad jam ruh iaka surok bah bad iaid shaduh ka dong Siehkynda.

Ka jingjia shah pynmynsaw ki nongialam shnong ka jia haka 3 tarik Kyllalyngkot haka por 11 shiteng mynmiet, ha ka por ba u Micky bad u Denis ki thmu ban pynjaijai iaka jingklumar hapoh shnong Tuber Kmaishnong, ka jaka kaba la tip kum ka Kamar Khlot, hynrei kyndit kynsan kila shah thombor ha u Training Phawa uba la mait da u sdie ia kine ki arngut haduh ba kila mynsaw jur.