Rah nam lahduh ka Don Bosco Soccer Academy iaka (L) Josephine Kharkongor U-13 Memorial Football Tournament

Syllad | The Rising MeghalayaJanuary 8, 2025

Ki khynnah rit ka Don Bosco Soccer Academy, ki la ioh ba kin rah ia ka nam kum ki lahduh ka lympung ialehkai (L) Josephine Kharkongor U-13 Memorial Football Tournament hadien ba ki la pynliem noh ia ka Josephine Kharkongor FC da 2-1, ha ka phainal kaba long ha madan ialehkai jong ka Rangdajied United FC Performance Centre haka 7 tarik K’lyngkot 2024.

Ia kine ki artylli ki kol, ki khynnah rit ka DBSA ki la ioh ba kin thep ha baroh ki ar kylla jong ka jingiakhun, katba ka shi kol jong ka JKFC ka la ioh ba kan thep ha ka minit ban saw ai noh ka jingiakhun kaba la wan ha ka dur jong ka penalty.

Shwa ka jingpyniakhun ia kane ka phainal, la pynlong shwa ruh ia ka jingiakhun ban iaknieh ia ka kyrdan kaba lai ne ka third place, kaba hangne ka kynhun ba la rah ia ka jingjop dei ka PFR hadien ba ka la pynliem noh ia ka Mawlai Grassroot Centre.

Ka jingpynlong ia kane ka phainal, ka dei artad ka sngi lyngkhuh snem ka sngi khlad kaba saw snem jong I (L) kong Josephine Kharkongor, ha kaba la wan ban sakhi lang da ki khun ki kti, ki khun ksiew jong I.

Kongsan bala wan ban ia don lang dei u Rangbah Shnong ka Pynthor u bah Syrpai Marbaniang, bah Eugeneson Lyngdoh.

Shwa ban sdang ka jingialehkai phainal, ka la don ruh ka jingdwai kaba la ai da Fr. Anthony Kharkongor, bad ka la don ruh ka jingrwai kaba la rwai kyrpang na ka iing ka sem, ki jingshad bad hadien kane la sdang pat ia ka jingialehkai phainal.

Ha kaba kut jong ka jingiakhun, ka la dei pat ka pali ban sam ia ki khusnam, ha kaba la iarap ban sam lang da ki rang ialehkai barim kum ki jong u bah Richard Nongneng, bah Freddy Kharpran, nalor u bah Khlain Pyrkhat Syiemlieh bad kiwei kiwei.

Ha kane ka sngi ka la don ruh ka jingsam ia ki khusnam ba shimet kaba kynthup ia ka nam best goalkeeper kaba leit sha Denzil Kharngi ka RUFC, Top Scorer la rah da Habankara Blah ba la ioh ban thep 10 tylli ki kol jong ka PFR bad Player of the Tournament ka leit Bashemphang Diengdoh.