Rah nam lahduh ka St. Paul’s HSS haka Inter School Athletic Meet ha Ri Bhoi District

Syllad | The Rising MeghalayaMay 19, 2022

Ki khynnah skul jong ka St. Paul’s Higher Secondary School, kila ioh ba kin rah ia ka nam lahduh ne overall champion haka lympung ialehkai District Level Inter School Athletic Meet, bala pynlong ha madan NSCA ha Pahamsyiem da ka ophis ka jong u District Sports Officer, Ri-Bhoi District.

Ha lyndet ka jinglah ka skul St Paul’s HSS ba kan ioh ban rah ia kane ka nam kum ka lahduh ha kane ka kynti kaba mynta ka wan hadien ba ka la ioh ba kan khur haduh 12 tylli ki takma ksiar, 4 tylli ki takma rupa bad 12 tylli ki takma rnong.

Ha kane ka kynti kaba mynta, la don kumba 20 tylli tam ki skul jong ka them Ri-Bhoi kiba la wan ban iashimbynta sha kane ka lympung, kaba la lah ban pynlong biang ia ka, namar ha ki ar snem kiba la leit, ia kane ka lympung la hap ban pynsangeh noh naka daw ka jingwan ban lyngshop jong ka jingpang iabit Covid 19.

Lada ia phai biang sha ki nam jop jong ki skul, ha ka kyrdan iakhun jong ka U-14 ki khynnah kynthei ka nam jop ka leit sha ka kynhun ialehkai jong ka St John’s  Secondary School, ha ka kyrdan iakhun ka U-14 ki khynnah shynrang ka skul ba la rah ia kanam lahduh Little Blossom Secondary School.

Ha ka U-16 ki  khynnah kynthei ka skul ba la rah ia ka nam lahduh dei ka St. Alfred Secondary School bad ha ka liang ki khynnah shynrang la rah ia ka da ka St Joseph’s Higher Secondary School.

Ha ka kyrdan iakhun jong ka U-18 ka nam jop ki kynthei bad shynrang ka leit sha ka St Paul’s Higher Secondary School, bad dei kane kaba la pynlong ia kane ka skul ban rah ia ka nam kum ka overall champion.

Nalor katta la sam ruh ia ki khusnam ba kyrpang ne best athlete ha kaba  Ridahun Taro ka St John’s HSS ka la ioh ban rah ia kane ka nam bad na ka liang ki khynnah shyhnrang, la rah ia ka da u Afty Mawphiang Raid Nongbri Presbyterian SS.

Ha ka  kyrdan ia khun jong ka U-16 na ka liang ki kynthei ka nam best athlete la rah ia ka da ka Ameshka Majhong ka St Alfred SS bad na ka liang ki khynnah shyrang la rah ia ka da u Kitbok Bey ka St. Joseph’s SS.

Ha ka kyrdan iakhun ka U-18 na ka liang ki kynthei ka nam best athlete la khur ia ka da ka Milin Lyngdoh ka St Paul’s SS bad na ka liang ki khynnah shynrang la rah ia ka da u Bankitbok Lyngdoh ka RBP Higher Secondary Schhol.

Kongsan ba la wan ban sakhi lang ia kane ka sngi pynhap pyrda kane ka lympung dei u MLA ka Jirang Constituency u bah Sostheness Sohtun katba ka symbud kongsan dei ka District School Education Officer Ri-Bhoi District kong P.L Nonglait, u DSO u bah Bobby L. Nongbet, bad ba la iadon lang ruh kiwei pat ki riew pawkhmat, ki Headmaster ne Principal jong ki skul bad ki dkhot nongkit kam ka Ri-Bhoi District Sports Association.

Shuh shuh na ka liang ka ophis jong u DSO, ka  pyntip ba la dep ban jied ia ki khynnah kiba tbit ban ai shuh shuh ia ka prokram ia kilan ba kyrpang ia ki khynnah kaba long kum shi bynta ka jingpynkhreh ban sei madan pat ia ki naka bynta ban pyniakhun sha ka lympung bah State Level Inster School Athletic Meet ban sa pynlong da ka ophis jong ka Directorate of Sports & Youth Affairs.