Rah u Buromlangki Salahe bad ka Pynhun Chullet iaka kop mawkyndon- Golden Climb ka JTES ha Jowai

Syllad | The Rising MeghalayaMarch 27, 2022

U Buromlangki Salahe bad ka Pynhun Chullet kila ioh ban rah iaka nam lahduh haka iakop kiew Mawkyndon ne ka Golden Climb kaba pynlong da ka Jaiñtia Tourism and Environment Society (JTES) ha Jowai haka sngi Saitjain.

Kane ka jingiakop kiew mawkyndon ka JTES ka dei shibynta ban rakhe ïaka lynkhuh snem ba 50 snem ka jingioh jylla ba pura ka Meghalaya.

Kane ka mawkyndon kadei kaba jrong kumba 300 metres kaba don ha Caroline Colony naka surok ban kiar iaka Jowai, ka Myntdu-Lad Nartiang Road.

Ia ka nam lahduh ba ar bad ba lai na ki shynrang la ioh da u Allan Rymbai bad u Teiboklang Biam, katba na ki kynthei ka Phyrnai Kyndait bad ka Nangkiewsuki Slong.

Ki lahduh kila ioh iaka khusnam pisa T.4000/-, ba ar T.3000/- bad ba lai T.2000/- ryngkat bad ka certificate.

Shuwa ban sdang kane ka jingkiew mawkyndon la don ka jingialang kaba lyngkot kaba iadonlang u Deputy Commissioner, West Jaintia Hills District ma Garod LSN Dykes uba la kaweh ruh iaka lama ban sdang ka jingmareh, u Ma MS Lhuid founder member ka JTES, u Ma Philemon Lyngdoh bad kiwei kiwei ki dkhot ka JTES bad ki nongialam shnong ka Caroline Colony.

U Ma Philemon Lyngdoh ula ong b aka jingpynlong ia kane ka Golden Climb kalong ruh shibynta ban pynlong ia kane ka jaka kum ka jaka ban khring iaki nongwan jngohkai kumjuh ruh iaki nongialehkai bad ki samla ban kilan ha kane ka jaka.

Ula ong ba ia kane ka mawkyndon yn shna pynbha lyngba ka skim pynbha pynmiat shnong kaba la ioh naka tnad Tourism bad u kyrmen ha ki sngi ban wan ki dang bun shuh shuh ki nongiashimbynta ha kane ka iakop kiew mawkyndon ne ka Golden Climb.

Ia ki khusnam sha ki nongjop la sam da u Ma Wailadmiki Shylla kum u kongsan haka jingialang kaba lyngkot kaba long ha iing dorbar ka shnong Caroline Colony.

Shuh shuh ka JTES ha ka 23 tarik u bnai Iaiong (April) kan don ka Marathon na Thadlaskein haduh Jrisalein bad hadien kan don ka jingiakop pynkhuid surok ha ki bynta jong ka rud Wah Myntdu.