Rah u Dabit Dkhar bad ka Phyrnai Kyndait iaka jingmareh Cross Country ka NPP Iawmusiang

Syllad | The Rising MeghalayaDecember 21, 2024

U Dabit Dkhar na Sabahmusawang bad ka Phyrnai Kyndait na Mukhaialong kila rah iaka nam lahduh haka jingmareh Cross Country kaba 10 KM ha sor Jowai.

Ia kane ka jingmareh Cross Country la pynlong da ka National People’s Party (NPP), Iawmusiang Unit. Ka mat pdeng jong ka long “Say No to Drugs”.

Kane ka jingiamareh kala long kaba shongshit bha kaba la sdang na Lad Nangbah bad ka pynkut ha madan Jrisalein, Chutwakhu Jowai. La wan ban iashimbynta haduh 190 ngut ki nongmareh na kylleng ka rilum Jaintia.

La wan ban kaweh lama da u MLA Jowai ma Wailadmiki Shylla haka jingiadonlang u DSO West Jaintia Hills District Khroobok Passah, NPP Iawmusiang Unit President Eddystone Shylla nalor ki dkhot nongkitkam ka NPP Unit.

Ka jingthmu kane ka jingmareh kalong ban ialap pynsngewthuh iaki nongshong shnong iaka jingsniew u drok haka imlang sahlang bad ban hikai iaki samla samhoi kynthei bad shynrang ban kiar na une u jingdih pynbuaid ba shisien bala ngop la eh ban lait na ka jingshah khum ha u kynjri jong u drok.

U Wailadmiki Shylla ula ban jur iaka jingiatreilang jong baroh haka imlang ka sahlang ban iakhun pyrshah ia u drok bad ula ong ba ka sorkar ruh kala shim iaki sienjam ba har rukom ban iakhun iaka thma drok.

Kiwei ki nongjop na ki shynrang ki dei u Daiohemitre Suting na Sohmynting bad u Knerlang Phawa na Tuber Kmaichnong kiba la wan haka kyrdan ba ar ba lai, bad na ki kynthei ka Heimonki Khaii na Lumshyrmit bad ka Rosy Sana na Mukhaialong kila wan ba ar ba lai na ki kynthei

Ka khusnam kaba kyrpang- youngest participant kala leit sha u Lumlangki Lhuid na Iawmusiang, bad ka oldest participant, ka Romika Pyrtuh na Sohmynting. Baroh ki nongjop kila ioh rah iaka song pisa kaba la synniang da u MLA ka Jowai.