Rah u Dasaman bad ka Phyrnai iaka North East Festival Marathon ha Jowai

Syllad | The Rising MeghalayaMay 1, 2022

Kum shibynta ban rakhe iaka Azadi Ka Amrit Mahotsav ne ka jinglehkmen iaka jingioh laitluid ba 75 snem ka Ri India, ka ophis u Deputy Commissioner, West Jaintia Hills District, Jowai ryngkat ka jingïatreilang ka ophis u District Sports Officer, West Jaintia Hills District, Jowai kala pynlong iaka North East Festival 2022 Marathon-Cross Country Run” haka sngi Saitjain.

Ha kane ka jingmareh marathon la iashimbynta ki kynthei, shynrang bad kiba la heh rta bad kiba khynnah tam.

Kane ka jingmareh kala sdang na Kiang Nangbah Stadium bad ïaid lyngba ka surok bah Ladthadlaboh, Kiang Nangbah College, By Pass Myntdu Bridge, Amlarem By Pass, Stand War, Mynthong, Chutwakhu, Mission Compound, Iongpiah, Dulong, Tpep Pale, Iawmusiang, New Hill bad la pynkut biang ha Kiang Nangbah Indoor Stadium.

U Superintendent of Police West Jaintia Hills District Bikram D Marak ula kaweh iaka lama ban sdang kane ka jingmareh.

Haka Men Category, u Dasaman Kyndait ula wan nyngkong, u Belin Dkhar bad u Damang i Lyngdoh kila wan ba ar bad ba lai.

Na ki kynthei pat, ka Phyrnai Kyndait kala wan nyngkong, bud sa ka Happiness Phawa kaba wan ba ar, Nangkiewsuki Slong balai.

Ki nongjop kila ioh iaka khusnam pisa T.5000, T.3000 bad T.2000 bad ka syrnod.

U ma Ram Ryngkhlem ula ioh iaka khusnam nongiashimbynta ba tymmen tam ne oldest participant bad u Mihsalan Shylla uba khynnah tam ne youngest participant. Kine ki ar ngut kila ioh ka khusnam kaba mar T.1000 bad ka synrod.

La sam iaki khusnam da ka Additional Deputy Commissioner, West Jaintia Hills District haka jingiadonlang u DSO, WJH ma Khroobok Passah bad kiwei kiwei.