Rah u MLA ka VPP da ka privilege motion pyrshah ia u Lamphang halor ka CAG Report

Syllad | The Rising MeghalayaFebruary 23, 2024

U nongmihkhmat liang pyrshah ka Voice of the People Party (VPP) na North Shillong, u Bah Adelbert Nongrum haka 22 tarik Rymphang u la wanrah da ka privilege motion pyrshah ia u Lamphang ne Speaker ka iingdorbar thawain, u Thomas A Sangma namar ka jingkhanglad ban wanrah ia ka CAG Report ha ka jingiatai hapoh ka iingdorbar. 

Hynrei, ia kane ka motion la kyntait noh da ka iing hadien ka jingpynlong da ka voice vote ha kaba ka liang pyrshah kaba duna briew ka la shah rem.

Na ka liang u Bah Adelbert u la ai ia ka jingujor privilege motion pyrshah ia ka rai jong u Lamphang ka iingdorbar thawain ban ym pdiang ia ka special motion ka jong u na ka bynta ban iatai halor ka kaiphot jong ka Comptroller Auditor General of India (CAG)  kaba iadei bad ki jingkhein jingdiah ha ki jingtreikam jong ki tnat sorkar haduh kaba kut jong ka 31 tarik u Lber 2022, kata da kaba pynpaw ba la pynduh noh ia ka hok ka jong u.

Halor kane ka bynta, u Lamphang u la ong, “Ka assembly secretariat ka la pyntip sha u (Nongrum) katkum ka shithi ba la ioh pdiang na u Myntri Rangbah ka jylla u Conrad K Sangma kaba ong ba yn ym lah ban iakren ia ka CAG report hapoh ka dorbar namar ka dang don ha ka jingpeit jingkhmih jong ka PAC (Public Accounts Committee).

Kham hashwa na ka liang u Bah Nongrum u la ong ba kum u dkhot u don hok ban rah bad ban iakren halor kino kino ki mat hapoh ka iingdorbar thawain ka jylla, bad ba katkum ki kyndon u don ia ka hok ban rah ia kane ka mat kaba iadei bad ka CAG report ban iatai hapoh ka dorbar, hynrei na ka liang u Lamphang u la khanglad bad pynduh noh ia ka hok ban ioh jingtip.