Rah u Nujorki Sungoh da ka call attention ba mih ki kynhun kaikhlaw, ong u CM Conrad lah pynkhlain bor pahara ha khappud

Syllad | The Rising MeghalayaSeptember 21, 2023

U Myntri Rangbah ka jylla u Conrad K Sangma haka sngi Palei u la ong ba na ka liang ka sorkar ka la pynkhlain shuh shuh ia ki bor pahara ha ki jaka khappud ka Meghalaya, Assam ha ka thain Block I hadien ka jingkynnoh halor ka jingmih jong kawei ka kynhun kieng atiar bathymmai jong ki jaidbynriew Karbi ka United People’s Front of Karbi Longri (UPFKL).

Haba jubab ia ka call attention ba la wanrah da u MLA ka UDP na Mowkaiaw u Bah Nujorki Sungoh, u Sangma u la ong ba watla kila iohsngew ia kane ka khubor, hynrei kim pat shym la ioh satia ia ka jingtip kaba thikna lane ba kan don ka jingujor da kino kino ki nongshong shnong halor ka jingshah dawa pisa ha ki dkhot jong katei ka kynhun.                            

Watla katta u CM u la ong hadien ka jingsakhi lyngba ki lad pathai khubor halor ka jingmih jong kane ka kynhun, na ka liang ka sorkar ruh ka la pynkhlain shuh shuh ia ki bor pahara ha kitei ki thain khappud.

Nalor kata u la ong ruh ba ka shithi ka la wan poi ruh na ki kynhun sengbhalang sha ka sorkar halor kane ka bynta hadien ba ka sorkar ka la shim ia ki sienjam, kata na ka liang ka sorkar, tnat pulit bad ki bor pyniaid district ki la trei khlem shongthait ban pynthikna ban pynneh ia ka shongsuk shongshngain ha kine ki thain khappud.

U Conrad u la ong ba ka jingsngewkhia bala pynpaw da u dkhot ka dei kaba kongsan. Ka histori jong ka Block I bad Block II ka dei kaba la iatip da baroh ba ka jingpynkynriah ia ka Block I bad Block II ka dei tang namar ka jingsuk ha ka synshar khadar. Kane ka dei kaba don ha ka jingthoh ha ka Sorkar Meghalaya, ka Sorkar Assam bad ka Sorkar India.

“Haba phaikhmat halor kane ka bynta ngi la sdang ban iakren bad ka Sorkar Assam kumjuh bad ka Karbi Anglong Autonomous Council (KAAC). Ngan kiar noh na ka jingiakren halor kane bad kumno ba ngin iaid shakhmat. Ha ka sien ba nyngkong ngim pat ju iohi ia kum kane ka jingshimkhia jong ka Sorkar Assam bad ka Sorkar Meghalaya ban pynbeit ia ki kam iakajia pud” ong u CM.

Nalor kata da kaba pyntip ba kine ki ar jylla kin iakynduh biang ha ka taiew kaba nyngkong ne ba ar jong u Risaw na ka bynta ka jingiakren, u Conrad u la ong; “Kan don jingpynleit jingmut ba kyrpang ha kaba iadei bad ka thain Khanduli, Psiar, Block I bad Block II namar ki la don ki jingiakynad ba malu mala ha kine ki jaka.”

Halor ka jingkyrpad jong u Sungoh ban shna ia ka surok ha Khatkhasla bad ki bynta ka Mojem, u Sangma u la ong, “Nga la iakren bad u Symbud Myntri Rangbah uba la pyntip ba ka jingpynkhreh ia ka detailed project report (DPR). Kumta ka kam kala sdang halor kane. Hynrei, lada ki don ki bynta jong ka surok kiba ngat ha ki jaka kiba iakynad, ki lah ruh ban don katto katne ki jingeh.”

Ha kaba iadei bad ka jingkyrpad ban wanrah ia ka primary health centre ha Psiar bad Moolber, u Sangma u la ong ba kine ki shnong kiba hap ha ki jaka kiba mih ka jingiapher jingmut, hynrei na ka liang ka sorkar kan pynthikna ba ki paidbah nongshong shnong kim dei ban ngat ha ki jingeh. U la ong ba ki sorkar bala leit ruh ki la pyrshang ban pynleit jingmut halor kane ka bynta khnang ban pynthikna ba ki kam pynroi kin ym sangeh.

Na ka liang u Sungoh shwa kane u la kynnoh ba ka jingthmu jong kane ka kynhun kieng atiar bathymmai ka long ban pyntieng pynsyier ia ki Khasi Pnar kiba shong ba sah ha ki thain Block I, kata ha khappud hapdeng ka West Jaintia Hills bad ka West Karbi Anglong khamtam ha ki bynta jong ka Elaka Labang-Nongphyllut-Pangam Raliang.