Rai hapoh shi bnai hato ban pyllait ïa ka Meghalaya na ka MMD Act: Supreme Court

Syllad | The Rising MeghalayaFebruary 19, 2019

JOWAI:  Ka Supreme Court mynta ka sngi ka la bthah ia ka Sorkar Kmie ban shim ia ka rai kaba khatduh hapoh shi bnai hato kan pyllait ne em ia ka Jylla Meghalaya na ka jingpyntreikam jong ka Mines and Mineral Development Act kumba la kyrpad da ka Sorkar Meghalaya.

Kane ka hukum kala mih hadien ka jingshong bishar ïa ka mukotduma DN No 3067 jong u snem 2018 bala ai pyrshah da u Ma Lber Laloo pyrshah ia ka All Dima Hasso Students Union.

Ha katei ka jingshim bishar, la iatai ba ka Coal Ministry jong ka Sorkar Kmie ka la dep ai ia ka jingmynjur ban pyllait ia ka Meghalaya na katei ka Act na ka bynta u dewiong bad ia u lignite bad ka la dep pyntip sha ka Home Ministry jong ka Sorkar Kmie ha ka 10-8-2015. Shuh shuh ka Court ka la dep bthah ia ka Sorkar Kmie ha ka 7.5.2018 ban shim rai shwa ka 30-7-2018 halor kane ka ishu hynrei ka Sorkar Kmie kam pat shim rai haduh mynta.

U Additional Solicitor General uba mih khmat na ka bynta ka Sorkar Kmie u la iathuh ia ka Court ba ka Sorkar kmie ka la dep pan jingshai na ka sorkar Meghalaya ha u bnai December 2018 hynrei haduh mynta ka Sorkar Meghalaya kam pat ai jubab.

Halor ka jingdawa ban ailad ban shalan ia u dewiong, ka Court ka la ong ba ka dang ap ia ka kaiphod na ka technical committee bala thaw da ka Sorkar Meghalaya ban khmih halor ka jingdon jong u dewiong bala dep tih bad thew kumba la dawa da ki nongujor ha ka Court bad ka khmih lynti ia ka kaiphod hapoh saw taiew.

Halor ka jingdawa ban pynsangeh ia ka jingdie lilam jong u dewiong bala dep tih dep thew da ka sorkar da katto katne ki nongiasiad ain, ka Court ka ong lada ka Sorkar Kmie ka pdiang ia ka jingkyrpad jong ka Sorkar Jylla ban pyllait na katei ka MMD Act hapoh shi bnai te ka mut ka jingtih dewiong ka lah ban sdang biang bad ka jingdawa ban shalan dewiong bala dep tih bad thew kala kut.

Ka Court ka la bthah ia ka Sorkar Kmie ban pyndep noh ia ki kot ki sla kiba ia dei bad ka jingtih dewiong ha Meghalaya hapoh hynriew taiew bad ka court kan shong bishar biang ha ka 26.3.2019.