Rai iakhun elekshon MLA u MDC barim ka JHADC na Raliang Constituency

Syllad | The Rising MeghalayaAugust 20, 2022

U MDC barim jong ka Jaintia Hills Autonomous District Council (JHADC) u Ma Shemhok Garod haka sngi Saitjain ula pynbna paidbah ba un iakhun iaka elekshon MLA 2023 na 3- Raliang Constituency.

Ia kane ula iathuh haba kren bad ki nongthoh khubor ha Jowai bad u Shemhok uba long ruh u secretary ka UDP Raliang, ula ong ba ka daw ba ula rai ban iakhun ka long ba lada u poi sha ka thong un pynthymmai ïaka rukom treikam hapoh ka Constituency la kadei haka roi ka par haki shnong ki thaw, ka pule ka puthi, ka koit ka khiah khamtam ka surok kaba dei u bud lum jong ka ïoh ka kot.

“Ka jingnang jingstad ka long ka aktiar bah ban kyntiew ïaka ïoh ka kot jong kano kano ka thaiñ hynrei ka long kaba sngewsih pat ban ïohi ba ki jaka pule puthi kim biang satia bad ki nonghikai kim ïoh ïa la ka hok ka bainong kaba kidei ban ïoh,” la ong u Garod uba long ruh

Ula ong ba u angnud ban long u MLA ka Raliang khnang ba un lah ban wanrah ïaka jingkylla ha ka liang ka pule ka puthi.

Ha kaba iadei bad ka ticket ula ong ba u kwah ban iakhun na ka party UDP lada ioh ticket bad lada um ioh un hap ban shong pyrkhat shuwa bad ki nongkyrshan shuwa ban iaid shakhmat.

Haba ïadei bad ka khubor hamsaia kaba la kynnoh kiba bun balang ba ïa u (Shemhok Garod) la pynïeng da kiwei, ula ong kadei kaba khlem nongrim bad kidei tang ki jingpynwit pynthut na ka bynta ka jingpynkhreh iakhun election jong u.