Rai ka AJTCVA ban sangeh kamai kali khlem buh por sa ha rilum Jaintia

Syllad | The Rising MeghalayaFebruary 8, 2021

Mynta ka sngi ha jingialang kaba kyrkieh jong ki Synjuk ki nongkamai kali na East Jaintia bad West Jaintia hapoh ka lama jong ka All Jaiñtia Tourist & Commercial Vehicle Association (AJTCVA) kala rai ban sangeh kamai khlem buh por.

Ha kane ka jingialang kaba long ha Paradiso Conference Hall la iadonlang ki nongialam jong ki synjuk bapher bapher naduh ka WJHTODA, EJHDA, EJTODA bad JLLKTP.

Da kawei ka jingmut la rai ban sangeh kamai noh bad ban snohkti lang bad ka Meghalaya Joint Action Committee of Commercial Vehicle (MJACCV).

U President ka AJTCVA u ma Paila Kordor Lyngkot, u la ong ba kane ka jingsangeh kamai jong ki kan sdang naduh kapor 12 baje shiteng synia 9 tarik bad ym yn don kali Tourist shuh ki ban kamai.

Ha ka ka jingiadei bad ka jingslem jong ka AJTCVA ban iasnoh kti lang bad ka MJACCV, u Paila u la ong baka seng kam shym la ioh ia ka jingpyntip ne ka shithi kaba biang.  Hynrei hadien ba bun ki jingialang kiba ka seng ka la dep ban pynlong ha kine ki sngi ba la dep ka seng ka la sngewiahap ban sangeh kamai bad ban ia iasnohktilang bad ai ka jingkyrshan ia ka MJACCV halor kane ka jingsangeh kamai kali hapoh ka jylla.

Na ka liang u ma Paila, ha ka jingiadei bad ka jingpynhiar dor jong ka sorkar ia ka umphiang petrol, diesel tang 2 tyngka na ka bynta shi liter ka seng kam pat sngew iahap satia, ka seng ka kwah bad dawa na ka sorkar ba ka dei ban pynhiar ia ka dor umphiang haka dor kaba kham biang khnang ba ki nongkamai kali kin kham im.

Shuh shuh na ka liang u ma Paila haka jingiadei bad kane ka jingsangeh kamai ki kali Tourist hapoh ka Rilum Jaintia u kyntu ruh ia ki paidbah ban iasnohkti lang bad ai ka jingkyrshan kumjuh ruh ban iaishahlang ha kane jingsangeh kamai kali jong ka seng kaba la shim bynta lang da ki seng nongkamai kali bapher bapher hapoh ka jylla.  Ha ka juh ka por u kyntu ruh iaki nongniah kali shimet ne private ba ki ruh kin ai ka jingkyrshan lang ia ka seng ha kane ka jingsangeh kamai kaba dei na ka bynta ka jingeh jong ki paidbah babun balang bad ki nongniah kali kamai hi baroh.