Rai ka BJP ban ïakhun MP Election na Shillong Seat

Syllad | The Rising MeghalayaMarch 23, 2019

JOWAI: Ka elekshon sha ka ïing dorbar thawaiñ Lok Sabha ka la nang nang shongshit shuh shuh hadien ba ka seng Bharatiya Janata Party (BJP) ka la rai ban jied ia u MLA ka Shillong South u Bah Sanbor Shullai kum u kyrtong na ka 1-Shillong Parliamentary Constituency.

Ka party ka la pynbna ia ka kyrteng jong u Bah Sanbor kum kyrtong hynnin ka miet ha Delhi ha ka second list bad ka la hap ban jied napdeng lai ngut ki briew kiba applai tiket kynthup ia u Bah Sanbor bad ki ar ngut kiwei pat ki long u Bah E Mawrie u vice president jong ka BJP jong ka jylla Meghalaya bad u Bah Lakhon Kma u nonghikai jong ka North Eastern Hills University.

U Bah Sanbor un iakhun ia kane ka elekshon pyrshah ia u Bah Vincent H Pala uba long u MP ba mynta uba long u kyrtong ka Seng Indian National Congress bad ia u kyrtong monlang jong ka Meghalaya Democratic Alliance (MDA) u Dr. Jemino Mawthoh bad u kyrtong ka Khun Hynniewtrep National Awakening Movement (KHNAM) u Bah T H S Bonney.

Ka party BJP wat la ka donlang hapoh ka lama jong ka MDA hynrei ka la kyntait ban pdiang ia ka rai jong ka ban pynieng tang ia u Dr. Jemino kum u kyrtong monlang bad ka la iaid shakhmat ban pynieng ia u Bah Sanbor kum u kyrtong jong ka.

U Bah Sanbor u la jop ia ka elekshon  MLA naduh u snem 2008 ha ka por ba dang tip ia ka Shillong South Constituensy kum ka Laban bad um pat ju rem ha ka eleshon MLA haduh mynta.

U MLA jong ka Shillong South u dei u khun jong u Bah S Khongwir (bam kwai ha dwar U Blei) bad u don mynta 52 snem bad u shong u sah ha Kench Trace, Shillong.