Rai ka BJP ban pynieng kyrtong ha ka elekshon shiteng samoi na Gambegre

Syllad | The Rising MeghalayaJuly 9, 2024

Ka Bharatiya Janata Party (BJP) ka la shim ia ka rai ban pynieng kyrtong na ka bynta ka elekshon shiteng samoi na Gambegre Assembly Constituency.

Haba pyntip ia kane ha ka jingialang kaba la long ha ka 8 tarik Naitung, u president ka BJP ka jylla u Rikman G Momin u la ong, “Hooid Nga la dep ruh ban pyntip sha ki nongialam sha Delhi ha kaba ki la ai ka jingmynjur, hynrei mynta namar ki don katto katne ki jingpynkylla kumta ruh Nga la hap ban kyrpad biang ia ki sa shisien pat, hynrei ka long kaba thikna shispah percent bad ngin mih iakhun ha kane ka elekshon shiteng samoi.”

Haba kylli la ka party ka thmu ban pynieng ia u vice president ka party uba dei ruh u MDC ka Tura u Bernard N Marak kum u kyrtong ka BJP, u Momin u la ong, “Ngim pat shym la rai ia u kyrtong hynrei u Bernard u la trei shitom na ka bynta ka party bad kumta ma u ruh u don hok ban ioh ia ka tiket.”

Nalor kata u la ong ruh ba ka BJP ka la shim ia ka rai ban iakhun ha la ka jong ia kane ka elekshon na Gambegre, bad kam don satia ia kano kano ka jingthmu ban pan jingkyrshan na ka Seng National People’s Party (NPP).

“Em, ngin mih ban ia aireng ha kane ka elekshon, kumta ruh balei ngin donkam ia ka jingkyrshan ka jong ki. Ngim donkam ia ka jingkyrshan ka jong ki. Ngi dei la ka jong ka party. Namar ba ki dei ka bynta jong ka NDA, ngi burom ia u Myntri Rangbahduh bad dei na kata ka daw ngi la kyrshan ia ka NPP ha kane ka MP elekshon kaba la dep,” u la ong.

Ha kajuh ka por u Momin u la kyntait ruh ba da ka jingkyrshan ia ka NPP, ka la don ka jingktah ia ka bhah ioh vote jong ka BJP.

Nalor kata une u president ka BJP u la kynnoh ruh ba kim shym la don satia kino kino ki kam pynroi hapoh Gambegre constituency ia kaba la mihkhmat da u MLA barim uba dei mynta u MP ka Tura u Saleng A Sangma mynta lah 15 snem kynthih.