Rai ka BJP ban sei kyrtong ban ia aireng ha ka elekshon MDC ha Rilum Khasi bad Jaintia

Syllad | The Rising MeghalayaNovember 22, 2024

U nongialam ka BJP uba dei ruh u Myntri sorkar u Bah AL Hek ha ka 21 tarik Naiwieng u pyntip ba ka Bharatiya Janata Party (BJP) ka la shim ia ka rai ban sei kyrtong ban iakhun ha kane ka elekshon MDC ka ban long ha u snem u ban wan ha Rilum Khasi bad Jaintia.

Haba kren sha ki lad pathai khubor, u Bah Hek u la ong ba ka party ka la iakren halor ka phang ha ka jingialang kaba la long hapdeng ki dkhot kiba la kham rangbah kaba kynthup ia u president, ki vice president, general secretary bad kiwei.

“Ngi don ia ka jingmut ba ka party ka dei ban pynkhreh ban mih ia aireng ha kane ka elekshon ka ban wan sha ka KHADC bad JHADC,” ong u Bah Hek.

Katkum ka jingong jong u haduh mynta ka party ka la ioh pdiang ia ki aplikeshon tang na ki arngut kiba pynpaw ia ka jingangnud ban iakhun ia kane ka elekshon na ka tiket jong ka BJP kiba dei na Ri Bhoi District.

Ka BJP ka don uwei u MDC ha Garo Hills Autonomous District Council (GHADC).

Watla katta u Bah Hek u la ong ba ka party kan ym kwah satia ban iakhun ia kane ka elekshon MDC tang na ka bynta ban shu iakhun ia ka elekshon. “Kumta dei ban khmih bniah halor ka jinglah ban jop jong ki kyrtong haba ai tiket jong ka party,” u la bynrap.

Halor kane ka bynta une u nongialam ka BJP u la ong ba na ka liang ka Party kan sdang noh ia ka jingpynkhreh ia kane ka elekshon MDC.